Plie ka Jowai City YMCA iaka drop in centre ki tymmen ki kro
U Additional Deputy Commissioner (ADC) ka West Jaintia Hills District Bah MB Tongper ula plie paidbah iaka Senior Citizen Drop In Centre & Cum Day Care Centre kaba don ha Ladthadlaboh ka surok ban leit sha madan Kiang Nangbah Stadium.
Kane ka centre kadei kaba pyniaid da ka Jowai City YMCA lyngba ka jingkyrshan ka District Social Walfare West Jaintia Hills District na ka bynta ban ri ban sumar ia ki tymmen ki kro kiba donkam bha ka jingpeit jingkhmih kaba kyrpang.
![](https://www.syllad.com/wp-content/uploads/2024/09/JIT-Vacancy-823x1024.avif)
U Rev GS Shullai Secretary Jowai City YMCA haka jingkren lamkhmat ula ong ka jingdon jong kane ka Centre kan iarap ban weng iaka jingsngew marwei ka jong ki da kaba ki wan ban pynlut por ban iakynduh paralok bad iakren iabiria la ka long ki jingeh ne jingkmen.
Ula iathuh ruh ba ha kane ka Centre yn don shibun ki jait jingpynbyrngia ki ban long shibynta ka jingim jong ka jinglong tymmen. Nalor nangta yn don ruh ki nongpeit kyrpang kiba lah ban thew iaka BP, ka jingkhia jingsting jong ka met ka phad nalor kiwei kiwei.
Ula pyntip ruh ba kum ka jingsdang yn pdiang shwa tang 25 ngut. Kane Centre kan plie naduh ka por 9.00 baje mynstep haduh 4.00 baje janmiet.
U Bah MB Tongper kum u kongsan haka jingkren ula ong, ka jingdon kum kine ki Centre kan long ka jingkyrkhu kaba khraw bad lada phai sha ri sepsngi kum kine ki jaka ki bun bha namar ba kiba san haka rta kidei ki dkhot kiba donkam bha haka imlang sahlang.
Katba nangheh ka rta katta nang duna ki paralok hynrei haka juk stad mynta lyngba ki kor ki bor teknoloji lah ban iajan bad no bad no ha kano kano ka jaka kaba long kawei na ka lad kaba lah ban pynkoit iaka jingsngew marwei, la ong u MB Tongper.
![](https://www.syllad.com/wp-content/uploads/2024/05/Drop-In-Centre-1-1250x703.webp)
![](https://www.syllad.com/wp-content/uploads/2024/05/Drop-In-Centre-3-1250x703.webp)
Ula pynpaw ruh ka jingkmen ban don kum kane ka Centre ka ban peit kyrpang ia kiba la san rta na ka bynta ba kin wan ban pynlut por ban shongkai ba kin lait naka jingsngewkynjah bad sngewbyniaw.
Kiwei de kiba la ai jingkren ki long ka Kong R. Passah, District Social Welfare Officer, u Bah Shamir Thabah, Regional Secretary, NE Region, YMCA uba la iathuh iaka jingsdang jong ka YMCA haka jingialang kaba la pyniaid da u Tbn. John R. Chullai.
Leave a Reply