Plie ka kong Ampareen iaka building thymmai ka Mawkdok Sub Centre

Syllad | The Rising MeghalayaNovember 25, 2023

Ka Myntri ka Tnat ka koit ka khiah ka Dr. M. Ampareen Lyngdoh haka sngi Thohdieng ka la plie ia ka iing building kaba thymmai jong ka Mawkdok Sub Centre – Health & Wellness Centre ha ka jingiadon lang u MLA ka  Sohra Constituency, u Bah Gavin M Mylliem.

Haba kren ha ka prokram, ka Dr Ampareen ka la ong ba ka sorkar ka don ia ka jingkut jingmut kaba skhem ban trei borbah ban kyntiew ia ka koit ka khiah ha ki thain nongkyndong, bad na ka liang ka sorkar ka la thaw ia ki health centre kiba kham rit da kaba pynshong nongrim halor ka jingduna ka jingdon briew.

Ka la ong ba na ka liang ka sorkar ka la pynkup bor ruh ia ki Dorbar Shnong ba kin khmih ia kine ki health centre.

Ka Myntri ka la ong ruh ba ka sorkar ka don ia ka jingthmu ban kyntiew ha baroh ki liang ha kaba iadei bad ki kam aijingshakri ha ka liang ka koit ka khiah ha baroh ki hynniew hajar hynriew tylli ki shnong hapoh ka jylla.

“Ha ka por jong ka Covid-19 pandemic ki shnong ki thaw ki la lah ban pynpaw ia ka jinglah ban iakhun pyrshah ha ka liang ka koit ka khiah khamtam ha la ki jong ki shnong ki thaw,” ka la ong shuh shuh.

Ha ka juh ka por ka pyntip ba na ka liang ka sorkar ka la shim ia ka rai ba ia baroh ki Sub-Centres yn aiti ha ka jingpeit jingkhmih jong ki bor pyniaid shnong. Kumjuh ka la kyntu ruh ia ki nongshong shnong ba kin wan shakhmat ban pyniasoh ia ki MHIS jong ki bad u Aadhaar na ka bynta ban ioh ia ki jingmyntoi ha ki lad jingsumar.

Ia kane ka jingtei kaba thymmai la pynwandur katkum ka standard jong ka Indian Health Service (IHS) Type B model, kiba la biang pura na ka bynta ban pynkha khunlung hapoh ki kyrdan sub centre.

Kane ka Sub Centre ka don ruh ia ka kamra kha bad ka jaka sumar ia ki khunlung ba dang kha.

Kiwei pat kiba la ia don lang ha kane ka prokram ki kynthup ruh ia u Bah P. Tynsong, BDO ka  Laikroh Khatarshnong C&RD Block, Dr S.A Lyngdoh, DMHO East Khasi Hills District, Sordar Shnong Mawkdok, ki Doctors, ASHA nalor kiwei pat.