Plie ka MLA Sutnga Saipung ia u mot sah kynmaw ki nongseng ia ka Nongthymmai CSC Huroi

Syllad | The Rising MeghalayaDecember 22, 2023

Ka Nongthymmai Cultural and Sports Club Huroi ha ka 21 tarik Nohprah 2023, ka la ioh ban plie paidbah ia u mot sahnam jong ki nongseng jong kane ka sports club ha ka jingialang ba la pynlong ha madan ialehkai ka Nongthymmai cultural sport club ha ka jingiadon lang ka MLA ka 5 Sutnga Saipung constituency ka kong Santa Mary shylla kum ka kongsan.

Ka Kong Santa Mary haba kren kum ka kongsan hadien ka jingplie ia une u mot sahnam ka la kyntu kynpham ia ki nongkitkam ka sports club ba kin nanglah shuh shuh ban trei  shitom na ka bynta ka bha ka miat jong ka shnong ki thaw bad ka imlang sahlang.

Ka la ong ruh ba kan iatrei ryngkat ryngkat lang bad ki paidbah kumjuh bad ki nongialam shnong khnang ban warah ia ka jingkylla ha kaba ia dei bad ka shnong ka thaw kumjuh ruh ia ka sport club.

Nalor kata ka la ong ruh ba kan iai buddien ha kaba iadei bad ka sub-centre kaba don hapoh shnong  khnang ban ioh kynkiew kyrdan noh sha ka PHC, kumjuh bad buddien ha kaba iadei bad ka surok Sunapur shaduh Huroi, ka iew border hat khnang ban lah ban pyndep noh na ka bynta ka jingmyntoi jong ki paidbah ka thain hi baroh kawei.

Katba na ka liang u Rangbah Shnong, u bah Golden Marbaniang ha ka jingkren u la pynpaw ba ka ka Nongthymmai Cultural & Cports Club Huroi ka dei kawei na ki Club kiba don hapoh ka shnong kiba kham kiew ha ka liang ka jingialehkai sport, bad u la ong ruh ba kane sports club ka donkam ba kan don ka madan ialehkai ka ba biang, kata kum ka mini-gallery bad khamtam ka kynroh ban kynroh ia ka madan na baroh sawdong namar ka dei ka madan ka ba ym tangba ki ialehkai football hynrei la pyndonkam ruh ha kaba pynlong ruh ia kiba bun ki prokram kiba kham heh, kata kum ki jingiaseng heh, ki programme sorkar,ki jingialehkai football kiba heh bad kumta ter ter.

Ha kajuh ka por u la ai khublei kyrpang eh ruh ia ki nongialam jong ka club kiba la  trei borbah ban kyntiew ia kane ka sports club.

Nalor kata ha kane ka sngi ka sport club ka la pynkup burom ruh ia ki nongtrei mon sngewbha kiba don hapoh ka shnong Huroi,ia ki nongiashim bynta ha ki jingialehkai bapher bapher kumjuh ruh ia ki khynnah pule kiba don hapoh kane ka shnong.

Ha kane ka prokram ba la pyniaid da u president ka sports club u bah Al Khongshei la ia don lang ruh ki nongialam shnong naduh u Rangbah shnong, Secretary Bah Raja L suchen, ki riew pawkhmat jong ka thaiñ kum u bah Daya Lamare, ki nongialam  ka sports club,ki riew rangbah,ki samla jong ka shnong Huroi bad kiwei kiwei.

Ha shwa ban pynlong ia kane ka prokram la pynlong ia ka sports meet kaba arsngi kaba la pynlong da kane ka sports club, kata kaba kynthup naduh ka jingiakop mareh, Long jump bad kumta ter ter ha kaba la wan iashim bynta shitrhem da ki riew rangbah kynthei bad shynrang,ki samla bad khynnah.

Ha katei ka sngi ka la don ruh ka jingialeh football friendly match kaba la iakhun da ka Hingaria SC bah ka Youngstar SC,Huroi ha kaba ka Youngstar SC ka la ioh ia ka jingjop.