Plie ka Myntri khynnah ia ka PM-DAKSH ka prokram na ka bynta ki briew ba don jingduna ha Shillong

Syllad | The Rising MeghalayaFebruary 16, 2024

Ka Myntri khynnah ka sorkar pdeng kaba khmih ia ka Tnat Social Justice and Empowerment, ka Pratima Bhoumik haka 15 tarik Rymphang, ka la plie ia ka Skilled Training Programme kaba hap hapoh ka PM-DAKSH (Pradhan Mantri Dakshta Aur Kushalta Sampann Hitgrahi) Yojana na ka bynta ki briew kiba don jingduna ha ki dkhot met ha ka nongbah Shillong.

Ha kane ka prokram ba la pynlong ha Composite Regional Centre for Skill Development, Rehabilitation and Empowerment of Persons with Disabilities, Shillong, na ka liang ka Myntri ka la sam ruh ia ki NIRAMAYA Health Cards hapdeng ki nongioh jingmyntoi. Ki la ong 10 ngut na Shillong kiba la pynrung kyrteng na ka bynta kane ka training programme ha kane ka jingialang.

Haba aijingkren ha ka jingialang, ka Bhoumik ka la ong ba na ka liang ka sorkar pdeng ka kut jingmut skhem na ka bynta ban pynkup bor ia ki briew kiba don jingduna ha ki dkhot met bad ka la bteng ban trei katkum ka thong jong u Myntri Rangbahduh ka ri ban pynioh ia ka jingshakri sha baroh.

Ka la ong ruh ba kane ka jingkut jingmut ka la paw shai kdar lyngba ka jingwan jurip jong u PM Narendra Modi sha kane ka thain shatei lammihngi (North East) haduh palat 60 sien naduh u snem 2014, katba ka kynhun Myntri jong u ruh ka la wan jngoh sha kane ka thain haduh palat 450 sien.Kane ka la wanrah ka jingkylla kaba khraw ia kane ka thain bad na ka liang ka Tnat treikam jong ka ruh kam shym la sangeh ban plie ia ki lad ki lynti na ka bynta ki briew kiba don jingduna ha kaba iadei bad ka roi ka par.

Nalor kata ka la pynpaw ruh halor ka jingdonkam ia ki skill training programme na ka bynta ban pynkup bor ia kine kum kine ki briew bad na ka liang ka Tnat treikam jong ka barabor ka long kaba kloi ban ai kano kano ka jingkyrshan na ka bynta ka jingbit jingbiang ka jong ki.

Kane ka Myntri ka la ai ruh ia ki jingtip kiba bniah ha kasba iadei bad ki skhim ba la pyntreikam da kane ka tnat na ka bynta ki briew kiba don jingduna.Ka la pyrto ruh ia ki sienjam ba la shim da ka Composite Regional Centre for Skill Development, Rehabilitation and Empowerment of Persons with Disabilities (CRC- Shillong) na ka bynta ban ai ia ka jingshakri kaba paka sha ki briew kiba don jingduna ha ki dkhot met.

Shuh shuh kane ka Myntri khynnah ka la pyrto ruh ia ki sienjam ba la pynioh da ka sorkar pdeng  na ka bynta ki briew kiba don jingduna ha ki dkhot met da kaba pynlong ruh ia ki prokram aijingsumar bapher bapher nalor ki prokram aijinghikai na ka bynta ka jingiohkhiah kaba kham kloi.

Nalor kata ka la pynlong ruh ia ka jingiamir jingmut bad kine ki briew kiba don jingduna bad pynsnap ruh ia ki khana jingjop ba la pynpaw da ki nongioh jingmyntoi.Ha kajuh ka por ka la ai ruh ka jingiaroh ia ki sienjam ba la shim da ka sorkar jylla ban pyntreikam ia ki sienjam jong ka Ministry of Social Justice and Empowerment na ka bynta ka jingmyntoi jong ki briew kiba don jingduna ha ki dkhot met ha ka jylla.

Ha kane ka prokram la ia don lang ruh u Commissioner & Secretary Govt of Meghalaya, Social Welfare Department u Pravin Baksi, Commissioner for Persons with Disabilities ka Sabrella B Marak bad kiwei pat ki heh sorkar jylla.