Plie ka NESFAS ka Mei Ramew State Agroecology Cooperative Society ban rakhe ia ka sngi kyrpang ki riewlum

Syllad | The Rising MeghalayaAugust 10, 2024

Ka NESFAS ha ka 9 Nailar ka la plie ia ka Mei Ramew State Agroecology Co-operative Society shibynta ka jingrakhe ia ka sngi kyrpang jong ki Riewlum – International Day of the World’s Indigenous Peoples ha ka jingialang kaba la long ha Shillong.

Ha kane ka sngi la ia don lang ruh u Bah R Rymbai, Deputy Registrar ka Cooperative Society ka sorkar Meghalaya kum u kongsan uba la shim bynta ha ka ban plie pyrda ia kane ka society.

Ha kane ka jingrakhe ka NESFAS ka lah pynlong ruh ia ka iew jong ki nongrep ha ka ban pyni nam bad ban die iaki mar rep ha ryngkat ka jingshet tynrai na ki shnong ba la ia don bynta lang bad kane ka seng.

Ha ka jingkren u Kongsan u la ong ba ka jingplie pyrda jong ka Co-operative society ka dei ka ba kyrpang bad ka don ka jingiadei ba khraw bad ka rep ka riang bad ka bam ka dih tynrai. U la ai khublei na ka bynta ka jingkiew stet ha ka liang ka kam, bad ban ruh halor ka jingsdang ka ba shitrhem jong ka society bad sam ia kane ka jingkyrmen ba ka lah ban nang iar ha ryngkat ka jingiatrei lang jong kawei pa kawei ka shnong ha ki snem ban wan.

Katba u Directo NESFAS, u bah Pius Ranee u la pyntip shaphang ka projek ba la pyntyllun da ka NESFAS ka ba iadei bad ka jjinglum jingtip lyngba ka TAPE kum ba lah pynbit pynbiang da ka FAO-UN. “Ka jingmih halor jong ka jingwad jingtip lyngba ka TAPE study ka pyni bad ai jingmut ba ka dor jong ka jingiasam jingtip bad jingshimkhia ba la pynsuh thied ha ka liang ka synshar ka khadar bad kan iarap iaka pyrthei hi baroh kawei ban ialeh pyrshah ia ki jingeh halor ka spah mariang bad ka imlang sahlang ka ba sdang ban don ha kine ki por ba mynta. 

Na ka liang u Bah Shaiphar Dohling Chairperson ka Mei Ramew State Agroecology Co-operative Society i lah ai iaka kyntien Lamphrang da ka ba ong, “La seng kyrpang ia kane ka Society ban kyntiew ia ka ioh ka kot bad ban pynbha shuh shuh iaka jingiadei bad ki para shnong ha ki por ki ban dang wan bad ban trei na bynta ban pynbha ia ka mei mariang.”

Hadien u Bah Nestar Kharmawphlang u la pashat katto katne ki kyntien ba kane ka Society ka thmu ban kyrshan ia ka ioh ka kot ha ki shnong da kaba ai ia ki jinghikai bapher bapher bad ban pynshlur bad ai mynsiem ia ki nongshong shnong ban shim da ki rukom rep ba pynneh pynsah ia ka mariang bad kiwei de ki jait kam.

Ka jingplie pyrda ia ka Cooperative Society ka kynthup ia ki 19 tylli ki kynhun jong ki Primary Cooperatives na ki 19 tylli ki shnong. Ka Society ka la pynkhreh na bynta ki kynhun jong ka Primary Cooperatives ban ai jinghikai ha lor ki mat trei kam bapher bapher katkum ka jingdonkam jong ka Co-operatives. Kum shibynta jong ka mat treikam ka Co-operative a lah ia snoh kti lang bad ka SIRD bad BRDC.