Plie ka Shnong Moolamylliang ia ka jingpynriam Khristmas da ki jingthaba ba pynshohbiej

Syllad | The Rising MeghalayaDecember 19, 2024

Ka Shnong Moolamylliang, East Jaintia Hills ha ka 18 tarik Nohprah ka la ioh ban plie biang ia ki jingpynthaba Khristmas kiba pynshohbiej ha ka sien kaba hynriew kaba thmu ban khring shuh shuh ia ki nongwan shangkai na kylleng ban wan ban sakhi da lade ia kane ka jingpynriam pynbeit kaba kham i phylla nalor ka jingwan iashim bynta jong ki kynhun nongtem nongrwai ba pawkhmat.

Ha kane ka sngi la ia don lang ruh ka Kong Santa Mary Shylla MLA ka thain Sutnga Saipung kum ka Kongsan bad u Deputy Commissioner ka East Jaintia Hills u Shivansh Awasthi kum u Symbud Kongsan nalor kiwei pat ki riew pawkhmat.

Ia kane ka sienjam jong ka jingpynriam pynbeit kaba khring ia kiba bun bah ki nongwan shangkai na kylleng ha kine ki sngi shuti Khristmas la nyngkong ha u snem 2019 kaba long shibynta ban kyntiew ia ka kam jngohkai.

Naduh kine ki khyndiat snem ba la dep ka shnong Moolamylliang ka la kylla long ruh ka shnong kaba pawkhmat ha ka liang ka kam jngohkai, ka jingkhuid jingsuba, ka jingitynnad jong ka mariang bad khamtam halor kine ki jingpynriam Khristmas kiba pynthaba ia ka shnong ka thaw baroh kawei.

Mynta u snem ia kine ki jingpynthaba yn lah ban sakhi man la ka janmiet naduh mynta ka 18 tarik Nohprah haduh ka 3 tarik u Kyllalyngkot 2025. La pynkhreh ia ki jingpynbyrngia ba bunjait na ka bynta ki nongwan shangkai kiba ha baroh ki rta.

Ka Dorbar Shnong kan pynlong ruh da ka ‘Musical Night’ ha ka 24 tarik Nohprah ha kaba yn wan iashim bynta da ka kynhun tem ba pawkhmat na Jowai ka “Magnificent Obsession” nalor ka ‘Gospel Concert’ ha ka 25 tarik Nohprah 2024 ka ban sdang naduh ka por 6 baje janmiet nalor ka jingiashim bynta da u  D.J Wanshan bad Eladmitre Dkhar.