Plie paidbah iaka Rural Haat ha Namdong

Syllad | The Rising MeghalayaJuly 23, 2024

Ki nongshong shnong ka Namdong B ki la sakhi ia ka jingkiew ha ka liang ka roi ka par hadien ba ka Jaintia Hills Development Society (JHDS) ryngkat bad ka jingiatreilang bad ka National Bank for Agriculture & Rural Development (NABARD) ki la lah ban tei ia ka iew (Rural Haat) hapoh ka Shnong Namdong B.

Ka jinglut jingsep ba tei ia kane ka iew nongkyndong la bei pisa da ka NABARD haka dor T. 16 lakh bad la pyntrei da ka JHDS. Ia kane ka iew la plie paidbah da ka Kong JR Blah OIC/General Manager NABARD RO, Shillong ha ka 23 tarik Naitung 2024.

Ka Kong JR Blah haba kren haka jingialang plie kala pyni ia shibun ki jingmyntoi ba kane ka iew ka lah ban ai sha ki nongshongshnong. Ka la pynpaw ruh ia ka jingsngewnguh ia baroh kiba la iadonbynta ban shna bad pynbit pynbiang ia katei ka iew. Shuh shuh ka la ban khia ruh ia ki nongshong iew ba kidei ban sngewtrai bad lehkhuid ia katei ka jaka khnang ban wanrah ia ka koit ka khiah kaba bha ba miat.

U Fr. Manbha Pakem u ia aikhublei bad iaroh ia ka NABARD kaba la iarap pisa ban shna ia kane ka iew. U la pynpaw ruh ba kane ka Iew kan wanrah ia ka lad kamai jakpoh ia ki Longkmie bad ki nongrep jong katei ka thain hi baroh kawei.

Ka Kong SN Lamare, AGM NABARD ka la pynshlur ia ki kynthei kiba don haka ki kynhun Self-help Group bad ki Nongrep ba kin pyndonkam hok ia kane ka iew kaba ki la ioh khnang ban kyntiew ia ka ioh ka kot hala iing la sem. Shuh shuh la ai ka jingiaroh khamtam ia ka Jaintia Hills Development Society kaba la treishitom ban pynbit pynbiang ha ka jingtei ia ka tei ka Iing. U Dr. H Niang BDO Namdong C&RD Block u la kyntu ia ki bor ba dei peit ban kin wanrah shuh shuh ia ki kam pynroi sha katei ka thain ba dang sahdien ha kiba bun ki liang.