Plie paidbah ïaki kamra klas ba shna da ka HYC Mawlai Circle
SHILLONG: Ka HYC Mawlai Circle kala ïoh ban plie paidbah ïaki artylli ki kamra klass jong ka skul Mawlai Umjaiur LP & UP School haka sngi nyngkong. Ïa kane ka skul la pynshna da ka HYC Mawlai Circle ha kine ki khyndiat bnai ba ladep.
Ha kane ka sngi la iadonlang ki dkhot jong ka Managing committee(MC), ki kmie ki kpa jong ki khynnah skul, U Rangbah Shnong bad ki nongkitkam jong ka Durbar, ki dkhot ka HYC Mawlai circle kumjuh ruh ki nongiarap jong ka seng.
![](https://www.syllad.com/wp-content/uploads/2024/09/JIT-Vacancy-823x1024.avif)
Ki Nonghikai bad ki dkhot ka MC haba ai jingkren ki la pynpaw ka jingkmen bad ai ka jingiaroh ia ka HYC kaba la iarap ia kane ka skul lyngba kine ki 2 tylli ki kamra klass, ki la kren bynniaw ruh ia la ki nongmihkhmat kiba la leh matlah haba ki peit ia kane ka skul. La iathuh ba ia kane ka skul la sdang 40 snem mynshwa lyngba ka iing shong wai, sha ka sem masi bad mynta ka la long kume kumba ka long.
Kumba long ki khynnah baroh kiba pule ha kane ka skul kim donkam jingsiew ei ei ruh em lait noh tang ki skul uniform ba kin hap thied hi.
Ha kane ka sngi ki nongiarap ia ka seng ki la ai sngewbha ruh kumba 100 tylli ki shatri sha ki khynnah jong kane ka skul.
U Bah Donboklang Kharlyngdoh President HYC Mawlai circle haba ai jingkren nyngkong eh u la pynpaw ka jingsngew nguh ïa U Blei Nongbuh Nongthaw uba la don ryngkat bad ka seng ha kine ki saw snem ba ladep, bad ngi la pyrshang ban ai ka jingshakri kaba bha tam ia u paid ka bri. U la kyntu ia ki khynnah bad ki nongpyniaid skul ba kin long kiba trei shitom, khnang ba kane ka skul kan ioh ban sei ia ki riewkhraw kiba long kum u khlur u ban tyngshain ym tang ha kane ka dong ka thain hynrei ha ka Ri baroh kawei. U la kyntu ruh ia ki khynnah ba kin kiar na ki jingmlien kiba sniew bad ka pep skul shiteng por.
La ioh ruh ka jingkren na iwei i khynnah skul i ba la kyrpad ia ka Managing Committee bad ia ki bor ba halor ba la donkam kyrkieh ban kyntiew kyrdan noh ia kane ka skul na ka klass VIII sha ka klass IX bad ter ter shaduh klass X.
La pynshong shit ia kane ka prokram lyngba ki jingrwai bad jingshad na ki khynnah bad Nonghikai jong kane ka skul.
Leave a Reply