Plie paidbah u Jesse Suiam iaka Community Hall cum Youth Training Centre ka Pyrdishnong Moodymmai

Syllad | The Rising MeghalayaJanuary 17, 2022

U MDC ka Ummulong-Moodymmai Constituency u Ma Jesse Suïam ula plie paidbah ïaka Community Hall Cum Youth Training Centre jong ka dong Pyrdishnong kaba ha Moodymmai haka sngi Nyngkong.

Ïa kane ka Community Hall Cum Youth Training Centre la tei lyngba ka skhim Special Assistance Grant (SAG) jong u snem 2019-2020 haka jinglut kaba 2 lak tyngka.

Hashwa ka jingplie paidbah ka la don ka jingïalang lyngkot ba la pynïaid da u Ma Starwell Ryngkhlem haka jingïadonlang ki nongkitkam shnong nongkitkam dong bad ki nongshong shnong.

La ïoh ka jingkren lyngkot na u Waheh shnong ka Moodymmai u Ma Joseph Pariat, u Chairman ka shnong Moodymmai u Ma Emris Ksoo bad na u Secretary Dong Lembadme Rymbai uba la pynpaw ka jingsnewnguh ïaka Balang ba ka la shah sngewbha ïaka dong ban pynlong ïaka jingïalang ïapyrkhat kam haka ïingskul jong ka haki snem kiba la leit noh.

Ka dong Pyrdishnong Moodymmai ka dap da ka jingsngewnguh ïaka Dorbar shnong kaba la ai sngewbha ïa kane ka jaka kaba la ïoh ban tei ïaka ïing pyrkhat kam jong ka dong kumjuh ïa u MDC bad MLA ka thaiñ kiba la pynïoh ïa kane ka Community Hall Cum Youth Centre.

U Ma Jesse Suïam haka jingkren ula ong ba ula pyrshang ban ai ka jingshakri kaba janai tam bad kaba khuid ïa baroh ki shnong hapoh ka Constituency jong u.

“Nga dei u briew uba kwah bha ban kyntiew ïa ka roi ka par hapoh ka constituency bad haba nga sam skhim nga sam khlem leh shilliang ïano ïano na ka bynta ka jingbit jingbiang jong ka Constituency hi baroh kawei”, ong u Ma Suïam.

U MDC ula kyntu ïaki nongshong shnong ban long kiba sngewthuh jingmut bad kiba ïatreilang khnang ba ka dong ka shnong kan kiew ha ka roi ka par bad ula kyntu ruh ban sngewtrai ïa kane ka ïing kaba la mang kyrpang naka bynta ka bha ka miat jong ka dong ka shnong.