Plie paidbah u Ma Lahkmen iaka jaka buh mar rep ha Skhenpyrsit 64 lakh ioh ki nongrep naka FOCUS

Syllad | The Rising MeghalayaApril 27, 2022

U Myntri ka sorkar Jylla uba long ruh u MLA ka thaiñ u Bah Lahkmen Rymbui ula plie paidbah ïaka Collective Marketing Center (CMC) kaba la tei lyngba ka Integrated Village Cooperative Society (IVCS) ha Shkenpyrsit.

Ïa kane ka CMC la plie paidbah mynta ka sngi haka jingïalang sam Cheque shaki 81 ngut ki Producer Groups lyngba ka FOCUS bad MegLAM kaba la kot haduh 64 lak tyngka.

U BDO & Nodal Officer Amlarem EFC Amlarem C&RD Block haka jingkren lamkhmat ula ong, ha kane ka CMC yn buh ïaki mar ki mata ba pynmih da ki marjan shnong khnang ba kin ïoh ban pynïaid ïew haka dor kaba bit.

Ula ïathuh ba ka Meghalaya Livelihood Access To Marketing Programme (MegLAMP) haka jingïaid lynti ban kyntiew ïaka ïoh ka kot jong ki paidbah ka la ïoh ban rung sha ki 67 tylli ki shnong hapoh ka Block. Ula ïathuh ba ki Producer Groups hapoh ka MegLAMP ki la shim ïaka kam kum ka kam ri sniang, ri ngap, thung sohmurit bad rep jhur.

Ula ong, ka Shkenpyrsit IVCS kadei kawei na ki IVCS kaba la kiew bha haka liang ka rep ka riang ha kaba ka jingkynshew pisa jong ka (Saving) ka la poi sha ka 7 lak tam tyngka.

U District Veterinary and Animal Husbandry Officer ka West Jaiñtia Hills, u Dr. DI Kjam ula batai shaphang ka skhim Piggery Mission kaba la ai ka sorkar Jylla 20 lak tyngka. Ula pynshlur ïaki paidbah kumjuh ki riew shimet ban shim ïaka kam ri sniang ban kyntiew ïaka ïoh ka kot jong ki namar kumba long mynta da ki klur ka pisa ba shu tuid ei shabar jylla ha kaba leit thied sniang.

Ka ADC West Jaintia Hills ka Kong DD. Syngai haka jingkren kala kyntu ïaki producer Groups ban don ka jingïatylli bad shaniah iwei ïa iwei.

U Lahkmen Rymbui haka jingkren u kyrmen ba kane ka pisa ba la sam sha ki producer Groups, kan long kaba ai jingmyntoi ba kin nanglah ban pynbiang ïaki jingdonkam jong ki.

Ula batai ruh shaphang ka thong treikam ka sorkar kum ka piggery mission nalor ba kan kyntiew ïaka kam ri sniang ka long ruh kum shibynta ban ai mynsiem ïa kito ki khun samla kiba don ïaka jingthmu ban ïeng hala ki jong ki kjat, ka Jackfruit Mission, ka FOCUS Programme bad kiwei kiwei.

Ha kane ka sngi la ïoh ruh ka jingkren na u Sub Divisional Agriculture Officer u Bah C. Najiar, u W. Kyndait na ka Integrated Village Cooperative Society (IVCS) bad ka Kong Rosely Kasar dkhot Producer Group.

Hadien ka jingïalang la sam ïaka cheque shaki producer Groups.