Plie paidbah u ma Lahkmen iaka umdih ka shnong Mupyut ba shongdor T.7 klur bad ai T.19 lak sha ki lai tylli ki skul

Syllad | The Rising MeghalayaDecember 7, 2022

U Myntri ka tnad kam pohiing ka sorkar Jylla u Ma Lahkmen Rymbui ula plie paidbah ïaka Mupyut Water Supply Scheme kaba shongdor T. 7,46,19,600/- kaba na ka skim Jal Jeevan Mission (JJM) bad la tei pyndep tang hapoh shisnem.

Ïaka jingïalang plie paidbah la pynlong ha shnong Mupyut haka jingïadonlang ka Kong R. Kynjing Executive Engineer ka PHE Electrical Division, ki nongshong shnong ka Mupyut bad ki waheh shnong na ki shnong bapher haka sngi Balang.

Ka Kong R Kynjing haka jingkren ka la ong ka skhim umbam umdih ne Mupyut Water Supply Scheme kaba T. 7,46,19,600 la pyndep tang hapoh shisnem na bynta ki 417 tylli ki longïing jong ka shnong Mupyut bad ïaka tyllong um la tan na ki saw tylli jaka bad hapoh kane ka skhim la don kawei ka top kaba heh, 6 tylli ki top rit bad 34 tylli ki top um kiba heh ban sam um sha baroh kawei ka shnong.

Ka la ïathuh ba katkum ki kyndon jong ka JJM, ka shnong Mupyut kam pat dei ban ïoh ïa kane ka skhim kaba heh hynrei kane ka urlong dei lyngba ka jingbuddien bad jingshim khia jong u MLA ka thaiñ.

Ka Kong Kynjing ka la kyntu ïaki nongshong shnong ban pynneh pynsah ïaki tyllong um khnang ba ka um kan poi ha baroh ki thliew ïing jong ki nongshong shnong.

U Ma Lahkmen Rymbui uba long ruh u MLA ka Amlarem haba jingkren ula ong ka jinglah ban pyndep ïa kane skhim kadei lyngba ka jingïatreilang ki nongshong shnong kumjuh ki sahep ka PHE bad u Contractor.

Ula ïathuh ba ki nongshong shnong ka Mupyut kumjuh ka thaiñ Mupyut naduh ka jingkhang ïa u dewïong ki la shem jingeh ha baroh ki liang. Kumta ban kyntiew ïaka roi ka par ula wad ki lad ki lynti ban pynïoh jingïarap khamtam ïaki skul, ki surok kiba biang bad ki jingïarap shaki balang niam bapher bapher kiba hapoh ka shnong Mupyut

“Ki nong Mupyut ki la ai ka jingkynrshan bad jied ïa nga kum u nongmihkhmat bad ngan siew kylliang ïaki da ki kam pynroi namar kadei ka hok jong ki ban ïoh ïaki kam pynroi”, la ong u ma Rymbui.

Ula pynbna ruh ba ka Samanong kawei na ki nongrit hapoh ka thaiñ shen kan ïoh noh ïaka surok kaba shongdor 2 klur 21 lak tyngka na bynta 2 kilometre shiteng.

Shuh shuh, ula ong ka Amlarem Constituency ka la kiew ha baroh liang khamtam haki kam pynroi pynpar bad ula kyntu ïaki nongshong shnong ban nangai shuh shuh ka jingïatreilang namar ka jingïatreilang ka wanrah ïaka roi ka par haka imlang sahlang bad Constituency hi baroh kawei.

Hadien ka jingialang u Ma Rymbui ula sam ruh ïaki Work Order ban shna skul sha ka SMC ka Good Shepherd English School Mupyut kaba la kot T.8 lak,  Madan Tyrpaid R.C School T. 4 lak bad ka Mupyut U.P School T. 7 lak.