Plie paidbah u MDC Jesse Suiam iaka ïing hall ka Dong Mawsiang Nongkhroh

Syllad | The Rising MeghalayaDecember 29, 2024

Kan long ka sngi jingkynmaw iaka Dong Mawsiang Nongkhroh, West Jaintia Hills District, wat hapdeng ki jingeh hynrei la lah ban pyndep iaka jingtei iaka iing Dorbar Hall bad la plie paidbah ruh iaka da u MDC ka thain Ma Jesse Suiam haka 28 tarik Nohprah.

Iaka jingtei iaka iing Dorbar Hall la sdang da ka Sport Club Mawsiang ryngkat ka jingnoh synniang u (L) HB Dan MLA barim ka thain, kumjuh u MLA ba mynta Ma Sniawbhalang Dhar bad u MDC ka thain Ma Jesse Suiam.

Ka Dorbar shnong Nongkhroh lyngba u Waheh shnong Bah Elwin Rynjah kala pynpaw ka jingsngewnguh ia u MDC uba la synniang 2 lak tyngka na ka bynta ban tei pyndep ia kane ka iing Dorbar Hall jong ka dong Mawsiang kaba la sahteng la bun snem.

Ula ai khublei kyrpang ruh ia u MDC halor ka jinglehbha jong u ymtang iaka dong Mawsiang hynrei ia kiba bun ki kam pynroi bad jingmyntoi hapoh ka shnong naduh ka jingpynbha pynmiat iaka madan phutol, ka jingpynioh iaka jaka saitjain nalor kiwei kiwei ki lad jingmyntoi.

Ka jinglehbha jong kiwei, kadei ka kamram jong ki nongioh myntoi ban siew kylliang, la ong u Waheh shnong bad kyntu iaki nongshong shnong ka Nongkhroh ban ai jingkyrshan kaba pura bad ban pynjop don burom ia u Ma Jesse Suiam ha kane ka Election MDC khnang ba un nanglah shuh shuh ban rah ki kam pynroi hapoh ka dong ka shnong.

Nalor kata ula kyntu ruh iaki nongshong shnong ban ym don ka mynsiem khohnioh hynrei ban don ka mynsiem sngewnguh khnang ba ka dong ka shnong kan nangkiew haka liang ka roi ka par.

U Secretary Nongkhroh Bah Kyrmen Rynjah ula iathuh iaka jingeh jong ka Dong haka jingiaid lynti ban tei iaka iing Dorbar Hall bad pynpaw ruh iaka jingsngewnguh ia u (L) HB Dan uba la iarap ban pynieng iaki paia, kumjuh ia u Ma Sniawbhalang Dhar uba la synniang da ki tin bad kyrpang eh ia u Ma Jesse Suiam uba la synniang khambun ka jingiarap.

“Kum ka dong ngim dei ban klet ia kane ka jinglehbha jong u MDC, ngi dei ban siew kylliang iaka jingbha da ka jingbha”, la ong u Secretary.

U Ma Jesse Suiam haka jingkren ula pynpaw ka jingsngewkmen ba haka bor barit ula ioh ban mang pisa ia kane ka iing hall ha Dong Mawsiang bad u kyrmen ba kane ka iing Dorbar kan saindur iaka synshar khadar haka imlang sahlang bad lyngba jong ka yn pyrkhat kumno ban kyntiew iaka roi ka par hapoh ka shnong ka thaw.

Ula kyntu ruh iaki nongshong shnong ban shim iaka kum ka iing ka ban pyndonkam da baroh lang bad kaba lah ban ai ka jingshakri kaba bha tam haka imlang sahlang.

Haba iadei bad ka dong Mawsiang, ula iaroh iaka jingiatylli bad jingkitkhlieh jong ki nongshong shnong na bynta ki jingmyntoi jong ka dong ka shnat.

Kum ki nongmih khmat ngi don ka jingkitkhlieh ban peit iaki jingdonkam jong ki shnong ki thaw bad ka imlang sahlang, la ong u Ma Suiam bad pan ruh ka jingkyrshan na ki nongshong shnong ban ailad biang ia u sa shisien ban long u nongmih khmat jong kane ka constituency.

Iaka jingialang la pyniaid da u Chairman Bah Romes Diengdoh bad la pynphuh pynphieng ia kane ka sngi da ki jingrwai jingshad naki seng longkmie, ki samla bad khynnah ka dong Mawsiang Nongkhroh.