Plie paidbah u MP Shillong iaka khnap Thangbru ha Riatturiem

Syllad | The Rising MeghalayaNovember 6, 2023

U MP Shillong Ma Vincent H Pala haka sngi Nyngkong ula plie paidbah iaka khnap Thangbru-Kambel Shullai Eco-Friendly Crematorium kaba la tei ha Khlieh Riatturiem harud ka surok bah Jowai-Shillong.

Ha kane ka jingplie paidbah ia kane ka khnap thangbru la iadonlang u Dolloi ka Elaka Jowai, u Ma Puramon Kynjing, u Waheh shnong ka Khliehtyrshi u Ma Kitbok Rymbai, Ma OR Shallam president barim ka Seinraij Jowai, ma W Challam kni ka kur Challam, ki riew rangbah ka Seiñraij Jowai kiba haiing hasem ka Rina Challam kaba la ai sngewbha iaka jaka ban shna ia kane ka Khnap Thang-bru.

Iaka jingialang la pyniaid da u President ka Seiñraij Jowai u Ma Hercules Toi bad iaka nguhblei la pyndep da u Pator ka Elaka Jowai, u Ma Raymond Nartiang.

U Ma Vincent H Pala uba la ai jingiarap ban shna ia kane ka khnap Thangbru, haka jingkren ula iaroh ia u Ma Kambell Shullai (bam kwai ha dwar u Blei) uba lap ia kane ka buit thang-briew kaba tip kum ka Khnap Thangbru kaba iadei bad ka mariang bad kaba pyndonkam tang khyndiat eh ki dieng thang ban pyndep iaka niam thang.

U Ma Pala ula ong kum u MP um juh kyntait ban iarap ia kino kino ki jingiarap sha ki Seinraij bapher bapher.