Plie paidbah u Myntri Rangbah iaka St. Vincent De Paul Healthcare Centre ha Bishop House Mihmyntdu

Syllad | The Rising MeghalayaFebruary 9, 2022

U Myntri Rangbah ka Sorkar Jylla u Conrad K Sangma ula wan ban plie paidbah iaka St. Vincent De Paul Healthcare Centre & bad ka surok ban rung sha ka Samanlang Socio Cultural Pastoral Centre kaba la iarap pisa lyngba Chief Minister Development Fund ha Bishop House, Mihmyntdu, West Jaiñtia Hills haka sngi Balang.

Ha kane ka jingplie paidbah nalor u Conrad K Sangma la ïadonlang u Myntri ka tnad kam pohïing ka Jylla u Ma Lahkmen Rymbui, u MLA ka Jowai Ma Wailadmiki Shylla, u MLA ka Umroi Constituency u Bah Goerge Lyngdoh, u MLA ka Mawsynram u Bah HS Shangpliang, ki MDC ka JHADC, u DC ka West Jaintia Hills District u MA Garod LSN Dykes, IAS, u SP ka West Jaintia u Bikram D. Marak, Most Reverend Archbishop Victor Lyngdoh bad ki nongialam ka SSVPJAC.

U Conrad haba kren ula ong baka jingai sha ki Balang wat la kalong kaba rit, hynrei ka jingstad jong ki ban pyniaid kam bad ka jingpyntrei hok kala wanrah ka jingmyntoi ia u paidbah salonsar.

Ula ong ba jingdon kane ka centre kan long shisha ka jingkyrkhu kaba khraw ïaki nongshong shnong ka thaiñ kiba donkam ka jingiarap na ka, la ong u Sangma.

U Most Rev. Victor Lyngdoh, DD Archbishop Shillong ula kyrkhu bad pynkyntang ïaka St. Vincent De Paul Health Care Centre.

U Myntri Rangbah ula kular ruh ban theh jingïarap shuh sha kane ka center khnang ba kan nanglah ban pynjanai ïaki kam ba bha na bynta u paidbah.