Plie paidbah u Myntri Rangbahduh ka Ri ia ka Faecal Sludge Plant kaba T. 52 klur ha Shillong

Syllad | The Rising MeghalayaOctober 3, 2024

U Myntri Rangbahduh ka Ri u Narendra Modi ha ka 2 tarik Risaw u la plie paidbah ia ka Faecal Sludge and Septage Treatment Plant kaba kot haduh T. 52 klur ha Shillong ha kaba ka Myntri ka Tnad ka koit ka khiah ka Dr Ampareen Lyngdoh ka la khap ia u ribon na ka bynta ka jong u.

Kane ka jingialang ka long shibynta ban rakhe ia ka Swachh Bharat Diwas (Clean India Day), ha kaba u PM Modi u la plie ia buntylli ki project kiba kongsan hapoh ka ri kaba kynthup ia kane ka Treatment Plant ba la pyntrei da ka Shillong Municipal Board (SMB) hapoh ka Atal Mission for Rejuvenation and Urban Transformation (AMRUT).

Ka Dr Ampareen ka la pynpaw ba ka nongbah Shillong ka pynmih haduh kumba 32.37 million litar ka um jaboh ha ka shi sngi, kynthup ia ka um kaba iong na ki septic tank bad kumjuh kaba mih na ki jaka shet bad jaka sum ha kaba bun na kine ki tuid sha ki nala um. Kane ka plant kaba thymmai ba la pyndonkam da ki tiar ka juk kan pynkhuid ia ki um jakhlia na ki septic tank bad ki thliew painkhana.

Nalor kata ka la kren ruh halor ka jingpyrshang jong ka sorkar ban pynkhuid ia ki wah hapoh ka Swachh Bharat Mission, kaba la sdang ha ka 2 tarik u Risaw 2014, da u PM Modi. 

Kane ka plant kaba shongdor T. 52.08 klur, ka kynthup ïa saw tylli ki jaka pynkhuid um jakhlia ha Wahumkhrah bad Umshyrpi, kan pynkhuid ïa ki um jaboh bad ki um ba tuid na ki jaka pynkhuid jaboh bad la khmih lynti ba kan shakri ia haduh 1 lak tylli ki longiing ha nongbah Shillong.

Ka Myntri ka la pynbna ruh ia ki jingthmu ban buh ia ki jaka pynkhuid um jaboh ha ki jaka bym lah ban poi da ki kali cesspool. Nalor kata, la thied 24 tylli ki mashin tan um cesspool ban pynthikna ban lum ia ka sboh jakhlia ha ka por kaba biang bad ban iada na ka jingtuid ki tank septic.

Katba ka Kong Isawanda Laloo, IAS, Director ka Urban Affairs, ka la kren shaphang ka jingkiew sha ka nongbah kaba khuid bad kaba koit ba khiah, da kaba kdew ba ka nongbah Shillong ka kit 171 metric ton ki jaboh jabaiñ ha ka shisngi. Ka la ban jur ia ka jingdonkam ban pynkhuid bad pyndonkam biang ia ka um ban pynneh pynsah ia ki tyllong bad ai khublei ia ka jingpyrshang jong ki nongtrei municipal bad ki nongtrei ba khmih ia ka jingkhuid jingsuba ban pynneh ia ka khuid ka suba.

Kane ka plant kan shakri ia ka Shillong Urban Agglomeration, kan pynkhuid ia ka um jakhlia kaba 350 kilolitar ka um jakhlia bad septic tank man ka sngi. Ia ka um ba la pynkhuid lah ban pyntuid ne pyndonkam biang hapoh ka plant da kaba suk.

Ha kane ka sngi la pynkup burom ia ki 18 ngut ki Safai Mitra na ka Shillong Municipal Board da ka Janata Personal Accident Policy ba T.2 lak marwei, kiba la ai da ka National Insurance Company Ltd.

Kiba la wan ban ïadon lang ki kynthup ïa u P. K. Boro uba dei u CEO ka SMB bad u Secretary jong ka tnad pynroi sor ka Jylla Meghalaya, u Biangmon Lato uba long u Joint Director ka tnad pynroi sor, ryngkat kiwei pat ki heh na ka tnad pynroi sor ka Shillong Municipal Board, bad u Rangbah Shnong ka Laitumkhrah.