Plie u Phasmon Dkhar iaka centre SSLC exam thymmai ha Wapung Secondary School

Syllad | The Rising MeghalayaOctober 15, 2024

Ban pynsuk iaki spah ngut ki khynnah skul ka thaiñ, ka Meghalaya Board of School Education (MBOSE), kala ithuh noh iaka Wapung Secondary School, Wapung kum ka Centre kaba thymmai na ka bynta ban thoh iaka eksamin SSLC.

Kane ka jaka thoh eksamin ka Wapung Secondary School, Wapung kaba hap hapoh ka Wapung C&RD Block kadei ka jingdawa kaba la ap slem bha, namar ki khynnah skul kiba ngat ha kane ka Centre kaba thymmai mynshwa ki hap ban leit thoh eksamin shaduh Khliehriat bad Tuber.

Ki skul kiba ngat thoh eksamin ha kane ka Centre kaba thymmai ki long ka Sohkymphor Secondary School, Tia Chaphrang Secondary School, Sohkymphor, Step by Step Secondary School, Wapung, Mookhep Secondary School bad Wapung Secondary School.

Da ka jingsngewkmen halor kane jingioh Centre thymmai, ki bor pyniaid jong ka skul haka 15 tarik Risaw kila pynlong ka jingialang kaba kyrpang ha kaba u MDC ka thain Ma Phasmon Dkhar ula long kum u kongsan ban plie ia u maw nongrim haka jingdonlang u SDO, Khliehriat u Aditya Verma, nalor kiwei.

U Ma Phasmon Dkhar haka jingkren, ula pyrto iaki riew rangbah jong ka shnong Wapung kumjuh ka School Managing Committee ba wat hapdeng ki jingeh hynrei ki trei shitom na ka bynta ki khun ka thain naduh ki snem kiba la leit noh ha kaba ki la prat lynti bad pyniaid haka rukom kaba dei ban pynioh ia kane ka Centre.

“Ka jingdon jong kane ka Centre kan pynsuk bad weng ïaka jingkhuslai kaba khraw jong ki khynnah skul bad ki kmie ki kpa”, la ong u Ma Phasmon Dkhar bad bynrap ba haki snem kiba la leit noh ki khynnah ki shem jingeh ban poi biang por shaki jaka thoh eksamin namar ki hap ban mad iaka jingdheng kali.

Haba ai mynsiem iaki khynnah skul, u Ma Phasmon Dkhar ula ong “Ka jingnang jingstad kam don pud, ka long kaba kordor haduh katta katta namar ka lah ban wanrah ne ïada na ki kam sniew kiba bun jait jong kane ka juk ba mynta” bad ula bynrap ruh ba kum ki khynnah bad samla pule ki dei ban long barobor kiba trei shitom ha ki jingpule khnang ba kin nangkiew na kawei ka kyrdan sha kawei pat namar ka jingnang jingstad ka ai ruh shibun ki jingtip kiba thymmai.

U Ma Phasmon ula aikhublei kyrpang ruh ia u Myntri ka tnad pule puthi ka jylla uba la iarap ban pynioh ia kane ka Centre haka shnong Wapungskur.

U SDO, Khliehriat u Aditya Verma, IAS haba ai mynsiem iaki khynnah ula ong, “Haba nga don ha ka rta ka jong phi ngam shym la don jingmut ei ei ruh em ia kaei kaba nga kwah ban long ha ka jingim ka jong nga bad ka shim por ban ngan pyrkhat ia kaei kaba nga kwah ban long haka jingim ka jong nga. Kumta ruh nga kyntu ia phi ki khynnah skul ban shim ka por ban leh ia kaei kaba phi kwah ban long. Ai ba ka jingpyrkhat ka jong phi kan rai ia kaei kaba phi kwah ban long bad hadien ba phi la rai dohiap met bad mynsiem ha kata ka jingkwah ka jong phi namar ym don ba duk ne riewspah kiba lah ban khanglad lada phi don ia ka jingangnud bad ka jingngeit halade”.

U Waheh shnong Ma Postling Dkhar ula aikhublei kyrpang ia u Ma Phasmon Dkhar uba la iarap bad pyni lad pyni lynti haduh ban ioh ia kane ka SSLC Centre bad ruh ka jingkloi jong u ban pynbha pynmiat ia baroh kawei ka iingskul. Ula aikhublei kyrpang ruh iaka Dorbar Shnong bad ia u Kpa jong u MDC kiba la pynbha pynmiat iaka kynroh jong ka skul.

Ha kane ka juh ka sngi la pynkup burom ruh iaki 44 ngut ki khynnah kiba la pyndep iaka eksamin SSLC bad HSSLC.

Iaka jingialang la pyniaid da u Ma S Ed. Rymbai bad la ioh ka jingkren lyngkot na u Ma O. Sumer SDEO East Jaintia Hills District, u Ma Damewanhi Rymbai bad ka jingpule Histri jong ka skul na ka Kong Kyntilang Dkhar Headmistress jong ka skul nalor kiwei kiwei.

La pynphuh pynphieng ia kane ka sngi da ki jingshad bad jingrwai na ki khynnah jong ka skul. Iaka kyntien ai khublei la ioh na u Gratefulson Siangshai, secretary SMC.