Plie pyrda ia ka taiew lehkmen ka RC Eve Secondary School Mihmyntdu

Syllad | The Rising MeghalayaNovember 4, 2024

Kum shibynta ban pynshlur ia ki khynnah kiba don ha ki sap bapher bapher, ka RC Eve Secondary School Mihmyntdu ka la pynlong ia ka taiew lehkmen (School Week) kaba nyngkong eh ia kaba la plie pyrda da u kongsan u Ma. Demanson Lyngdoh, Asst. Director ka ophis Horticulture, Jowai haka 4 tarik u Naiwieng.

La pynphuh pynphieng shuh shuh ia kane ka sngi da ka jingiadonlang u symbud kongsan u Ma. Chewanki Phawa, Demonstrator jong ka Ophis Soil & Water conservation Jowai ryngkat bad kiwei de ki riew donburom kiba kynthup ia u Fr. Hilarius Lamare, Parish Priest Jowai Parish, u Fr. Manbha Pakem, Director ka JHDS, u Ma Fedrick Synnah, Chairman ka School Managing Committee, ka Sr. Sheela Thomas, principal ka Donbosco Secondary School, ki nonghikai bad ki khynnah pule jong kane ka skul.

Ha kaba sdang kane ka prokram, ka kong Jesica Biam kala pynpaw ba kane ka skul ka dei kaba la seng kyrpang na ka bynta ki khynnah kiba duk bad ki bym iohlad ban liet skul na kiba bun ki daw (out of School children). Kumta ka jingdon jong kane ka skul ka la plie lad ia shibun ki kynnah ban pyndep ia ka jingpule jong ki ha ryngkat bad ka jing kamai jakpoh.

Ka la ong shuh shuh ba ka dei ka jingangnud jong ka (Late) Tina Lakiang, ka Principal barim jong kane ka skul ban plie lad ia ki khynnah ha ki sap bapher bapher wat lada kim iohlad ban pule tikna kumba ioh kiwei pat ki khynnah skul.  Kumta halor kane ka nongrim la pynlong ia ka school week kaba nyngkong eh naduh ba la seng ia kane ka shlem ai jinghikai.

Haba ai jingkren, u kongsan jong kane ka sngi, u Ma Demanson Lyngdoh u la ai ka jingiaroh ia ki nongpyniaid jong kane ka skul kiba la iohi jingai ia ka jingdonkam jong ki khynnah kiba wan na ka longing baduk ba kyrduh. U la ong ba ka jingdon jong kane ka skul ka la long ka kabu ksiar ia khynnah baduk ban bteng ia ki jingpule jong ki wat hapdeng ki jingeh kiba bun. U la kyntu ruh ia ki khynnah jong kane ka skul ba ki dei ban treishitom bad minot bha ha ki jingpule jong ki khnang ba kin ioh ia ka lawei ba phyrnai.

Ha kane ka sngi sdang ki khynnah skul ki la ia shimbynta ha ki lai tylli ki jingiakop kiba kynthup ia ka jingiakop rwai (solo & Group) Jingiakop Shad (solo & Group) bad ka jingiakop pyni-riam (Fancy Dress).