Plie u bah Metbah Lyngdoh iaka Nongthyllep Health Sub-Centre

Syllad | The Rising MeghalayaSeptember 6, 2022

Ban pynurlong ia ka jingangnud jong ki paidbah ka thain Nongthyllep, Eastern West Khasi Hills District, u Speaker ka iing dorbar thawain ka Jylla, u Bah Metbah Lyngdoh ula plie paidbah iaka Nongthyllep Sub-Centre haka sngi ba ar.

Ia kane ka jingplie paidbah la pynbit pynbiang da ka ophis jong ka District Medical and Health Officer, West Khasi Hills District, Nongstoin ha ryngkat ka jingiatreilang jong ka  Directorate of Health Services (MI), Meghalaya bad ka Health Engineering Wing, Meghalaya, Shillong.

U Bah Metbah Lyngdoh, u la ong ruh ba ka jingplie ia kane ka Sub-Centre ka long shibynta jong ka jingpyrshang ka sorkar ban pynjan shuh shuh ia ki jaka sumar nongpang sha ki paidbah khamtam eh kito kiba hap hapoh ka jylli treikam jong ka Nongthyllep Sub-Centre.

Haba kren halor ka jingdonkam jong ka koit ka khiah ha ka jingim jong ki briew kaba man ka sngi, u kongsan u la kyntu ia baroh kiba la sakhi lang ia kane ka prokram bad khamtam eh ia ki longkmie kiba armet ba kin shim kabu ia ka jingdon jong ka Sub-Centre ha shnong Nongthyllep da kaba leit sumar bad phah eksamin tista bad ban ialam ruh iala ki khunrit ban iashimbynta ha ki prokram ai tika kiba pher ba pher ba ka tnat ka koit ka khiah ka ju pynlong na ka por sha ka por.

Kiwei kiwei kiba kren ki kynthup ia u MDC ka thain, u Bah Batskhem Ryntathiang, u Syiem ka Hima Nongkhlaw, u Pa’iem PM Syiemlieh, u Deputy Commissioner ka Eastern West Khasi Hills District, u Bah W Nongsiej, District Medical &Health Officer ka West Khasi Hills District, Nongstoin, Dr. SA Lyngdoh, u Junior Specialist, District Medical &Health Officer, West Khasi Hills District, Nongstoin, u Dr. W Sutnga  bad u Sordar ka shnong Nongthyllep, u Bah M Ryntathiang.

Da ka jingplie ia kane ka sub centre kala pynjan iaki paidbah ka thain ban ioh ai jingsumar bad kan pynsuk iaki longkmie kiba kha ba pun, ka jingai tika khyllung nalor kiwei kiwei ki jingjurip iaki jingpang bad ki prokram ka koit ka khiah.