Plie u CM bad ka Myntri ka Tnat ka koit ka khiah ia ka 10 Bed ICU Project ban kyntiew ia ka koit ka khiah

Syllad | The Rising MeghalayaDecember 20, 2023

U Myntri Rangbah ka jylla u Conrad K Sangma ha ryngkat ka Myntri ka Tnat ka koit ka khiah ka Dr Ampareen Lyngdoh haka 19 tarik Nohprah, ki la plie ia ka 10 Bed ICU project ha ki 14 tylli ki hospital sorkar ha ka jylla, kata kaba kdup ia ki 11 tylli ki district.

Kane ka project ka dei ka sienjam ba la shim lyngba ka jingiatreilang hapdeng ka Department of Health and Family Welfare, ka sorkar Meghalaya bad ka eGovernment Foundation. 

Haba kren ha ka jingialang plie ia ka project u CM ka jylla u la pyrto ia baroh ki kynhun kiba iadei bynta ban pynurlong ia kane ka projek kaba thmu ban kyntiew ia ka jingai jingshakri ha ki thain nongkyndong jong ka jylla kynthup ia ki district hospital.

“Kine ki jaka treikam bad ki kor ki bor treikam ba la pynbit pynbiang kin plielad ia ngi ba ngin lah ban pyntreikam pura ha ka rukom kaba dei khnang ba yn lah ban ai ka jingkyrshan ha ka liang ki lad aijingsumar wat sha kito ki thain kiba pajih ka jylla,” ong u Conrad.                 

Da kaba pynpaw ba ka thong ba hakhmat eh jong ka sorkar jylla ka long ban kyntiew ia ka imlang sahlang lyngba ka koit ka khiah, na ka liang u CM u la ong, “Ka sorkar jylla ka la mang kyrpang 8% na ka mang tyngka ban kyntiew ha ka liang ka koit ka khiah bad kaba dei ruh ka mang kaba heh tam hapoh ka ri.”

Katba na ka liang ka Myntri ka Tnat ka koit ka khiah ka Dr Ampareen Lyngdoh ka la ong ba lyngba kane ka project ka sorkar jylla kan lah ban lah ban pynbha ia ki lad jingsumar hapoh ki ICU hapoh ki district level. Ka la ong ruh ba ka jingplie ia kane ka project kan wanrah ka jingkylla kaba khraw ha ka jingai ha ka jingai jingshakri ha ka liang ka koit ka khiah ha ka jylla.                                

Ha kane ka jingialang plie ia kane ka projek ba la pyniaid da u Chief Secretary ka Jylla u Bah DP Wahlang, la ia don lang ruh u Principal Secretary Health u Sampath Kumar, Chairman ka Infosys u Nandan Nilekani, Chairman ka 10BedICU u Srikanth Nadhumuni, Founder ka Karuna Trust, Dr Sudarshan Hanumappa halor ki riew shemphang ka tnat ka koit ka khiah bad u Scientist Nichiket Mor.