Plie u CM bad u Myntri ka tnat Tourism ia ki jaka shongkai pynngad ha Mawphlang

Syllad | The Rising MeghalayaAugust 16, 2023

U Myntri Rangbah ka jylla u Conrad K Sangma, ha ryngkat u Myntri ka tnat Tourism u Bah Paul Lyngdoh mynta ka sngi ki la plie paidbah ia ki jaka shongkai pyngngad ia kiba la ai kyrteng “The Travellers Nest” hapoh ka shnong Kyiem ha Mawphlang, East Khasi Hills.

Kine ki jaka shongkai ki kynthup ia santylli ki iing rit ne cottage bad ka restaurant kiba thmu na ka bynta ban pynbit pynbiang ia ki jingdonkam jong ki nongwan shangkai pyrthei.

Kane ka Travelers’ Nest, ka dei ka project ba la bei tyngka da ka Meghalaya Age Limited (MAL) lyngba ka Meghalaya Rural Tourism Cooperative Federation Ltd., ha ka jinglut kaba T 94 lak.

Ka Mawphlang kaba jngai tang kumba 28 km na ka nongbah Shillong ka dei kaba la tip bha halor ka jingdon jong ki ‘Lawkyntang bad ka dei ruh ka jaka kaba khring shibun ia ki jongwan shangkai pyrthei na kylleng.

Na ka liang u CM Conrad Sangma ha ka jingkren plie u la ong ba kane ka dei u mawjan halor ka jingtrei borbah jong ka sorkar ban ai mynsiem ia ki nongshong shnong ba kin iashim bynta na ka bynta ban kyntiew ia ki kam jngohkai ki ban iarap ban kyntiew ia ka roi ka par.

U la ong ruh; “Ka jingkhlain ka jong ngi ka shong ha ka jingiadon bynta lang jong ka imlang sahlang bad kaba lah ban pynurlong ia ka jingasngnud ka jong ngi ban kyntiew ia ka ioh ka kot bad ka roi ka par lyngba ki kam jngohkai pyrthei.”

Nalor kata u la ong ruh ba ka kam jngohkai ka dei ka kam ba kongsan, bad ka thong jong ngi ka long ban thaw ia ka lad iohkam iohjam ka ban kot  sha ka shi lak ngut ha kane ka kam lyngba ki jingsengkam jong ki kynhun bapher bapher.

Shuh shuh u CM ka jylla ula pynpaw ruh ha kaba iadei bad ka prokram kaba dang shu pyllait thymmai-ka CM-ELEVATE programme kaba tyrwa ban ai subsidy naduh 30% haduh 75% ia ki project ba thmu ban pyntrei da ki nongsengkam la jong, kata na ka byntaki Self Help Group bad kiwei kiwei ki kynhun.

Haba pynpaw halor ka jingpynbha ia ki surok hap ka Jylla, na ka liang u CM ula ong ba ka jingshna pynba ia ka surok na Mawphlang sha Weiloi ka dei ka jingai sakhi jong ka Sorkar halor ka jingkut jingmut jong ka sorkar jylla ban pynkhlain ia ki lad pyniasoh lyngba ki surok ha ka Jylla.