Plie u CM Conrad iaka MRI ha Nazareth Hospital, Shillong, iarap sa T. 25 lak ban myntoi kiba wan na ki thain nongkyndong

Syllad | The Rising MeghalayaAugust 23, 2023

U Myntri Rangbah ka jylla u Conrad K Sangma mynta ka sngi Balang u la plie ia ka kor MRI hapoh Nazareth Hospital Shillong, ha kaba ha ka jingkren u la ai khublei kyrpang ia kane ka hospital bad ia baroh ki staff halor ka jingai jingshakri ka jong ki ha ka liang ka koit ka khiah khamtam na ka bynta ki briew kiba kham duna ha ka ioh ka kot.

Haba aijingiaroh ia ka jingshakri jong kane ka hospital u CM u la ong ruh ba ka jingioh ia kane ka kor jingsumar kaba thymmai (MRI facility) ka dei ka sienjam kaba khraw tam na ka bynta ban ai ka jingshakri kaba kham paka shuh shuh bad ka ban pynlong ruh ia ki nongshah sumar ba kin ym donkam ban leit leh sha kiwei pat ki jaka.

Nalor kata u la ong ruh ba ka bynta kaba iadei bad ka koit ka khiah bad ka imlang sahlang ka dei ka bynta kaba shem jingeh tam na ka bynta ka jylla. “Ka mat kaba iadei bad ka koit ka khiah ka dei ka bynta kaba shem shitom tam kaba ngi la hap ban khmih namar kiba bun ki jingeh kiba ngi la iaksaid, hynrei ha kine ki san snem ba la dep ngi la lah ban shimkhia halor baroh ki bynta kiba iadei bad ka jingtreikam halor ka koit ka khiah khnang ban lah ban kyntiew ia ka jingai jingshakri ha ka jylla hi baroh kawei,” ong shuh shuh u CM Conrad Sangma.

Nalor kata u la ong shuh shuh ba ki sienjam kiba ka sorkar ka la shim ha kaba iadei bad ka koit ka khiah kam dei ruh tang ha ka rukom aijingshakri ha ka liang ka koit ka khiah hynrei ruh naduh ka tynrai kaba iadei bad ka jinglong jingim jong ki briew.

U la ong, “Ngi kwah ban pynthikna ba ngi donkam ban tuklar naduh ka khyllipmat ba i khunlung i dang sdang ban seng hakpoh jong ka kmie tad haduh bad kin da khie samla.” U la ong ba ka jingtuklar naduh kaba sdang jong ka jingim ka long kaba kongsan bad ym tad hadien ba u briew u la kem pang.

Ia kane ka MRI machine la aijingiarap T.25 lak lyngba ka CMSDF bad na ka liang u CM u la pynbna shuh shuh ia ka jingiarap kaba 25 lak.

Ioh jingithuh ka Nazareth Hospital na ka NABH namar ka ai jingsumar ba bha tam

“Kane ka MRI hapoh Nazareth Hospital kan pynmyntoi shibun ia ki briew khamtam kito kiba wan na ki thain nongkyndong, kumta ruh Nga sngewkmen ban pynbna biang ia ka jingiarap kaba sa 25 lak tyngka khnang ba ki nongshong shnong ka jylla jong ngi kin ioh ia ki jingmyntoi kiba pura khlem da donkam shuh ban leit kylleng ki jaka na ka bynta ban leh ia ka MRI.”