Plie u CM Conrad iaka Wahiajer Mutli Sports Complex, shen yn sdang sa ka Inter Constituency Football Tournament

Syllad | The Rising MeghalayaJanuary 24, 2024

U Myntri Rangbah ka Jylla Conrad K Sangma haka 23 tarik Kyllalyngkot, ula plie paidbah ia ka Wahiajer Multi Sports Complex bad ula ong ba ka sorkar ka buh iaka thong ban tei pynbun shuh iaki kam tei jingtei haka kam sports ban ia kaba la dep tei ha ki 45 snem kiba la dep.

Haba plie iaka Wahiajer Multi Sports Complex, ula ong “Ngan pynthikna ba kane ka sorkar ka aiti na ka bynta ki samla ka jylla. Ha ki san snem kiba la leit, la theh khambun ka pisa ha kam tei jingtei haka kam sports bad ha kine lai saw snem ban wan, yn tei pynbun shuh ban ia kaba la dep ha ki 45 snem ba la dep.”

La iadonlang ha kane ka jingialang plie iaka sports complex kynthup ia ki Symbud Myntri Rangbah ka Jylla Bah Prestone Tynsong bad Bah Sniawbhalang Dhar, u Myntri ialehkai Bah Shakliar Warjri bad kiwei kiwei ki Myntri bad MLA.

Haba kren shuh shuh, u Conrad ula kdew iaka iaka jingjop ka sorkar MDA ha kaban shna iaki surok bad haba nujor ka jingshna surok kala kynjoh sha ka 35 percent ha ka jylla ha kine ki san snem kiba la dep. Ula ong ruh ba ki ophis block thymmai kila mih ha baroh ki jylla, bad bynrap ruh ba ki skul kila ioh iaki building kiba thymmai.

“Baroh ki PHC, CHC, Sub Centre la sdang shait shait ban tei thymmai bad maramot bad ha baroh ki District kiba ym don DC, SP ophis ka sorkar kala iaid shakhmat ban pynthikna ba kin ioh iaki ophis treikam kiba paka,” la ong u Conrad.

Ha kaba iadei bad ka jingplie iaka Pa Togan Nengminja Athletics Stadium ha Tura dangshen bad ka Meghalaya Games ba dang shu kut, ka long ka sakhi ban pynshisha ba ka Sorkar kut jingmut ban pynkupbor iaki samla ka jylla. Ula ong ba ka sorkar ka shimkhia ban phaikhmat sha kylleng ki jaka ha jylla ban theh iaki lad jingiarap ban pynioh iaki jaka ialehkai ha ki san snem ban wan.

U Conrad ula kyntu iaki paidbah bad ki nongialam ban ai ka jingkyrshan sha ka jingjop ka Meghalaya Games 2025 ka ban wan kaban long ha rilum Jaintia.

Ula pynbna ruh ba ka sorkar kan kreh syndon ban pynburom ruh ia baroh ki nongialehkai kiba khur takma ha ka Meghalaya Games kaba la dep shen ha sor Shillong. “Ki nongjop kin ioh ruh iaka song pisa ba kin ioh ban pynlut ha ka kam ialehkai kaba ki jied,” ong u Conrad.

Ka Sorkar ka buh iaka thong ban phaikhmat ban kyrshan iaki samla la ka kam ialehkai, ka jingstad ne ka buit, ka seng kam, ka put ka tem. Kan don ruh ka jingiakop haka Science ka Mathematic bad ki buit thymmai ban pynshlur bad aimynsiem ia ki samla ka jylla, la ong u Conrad.

Ula iathuh ruh ba ka shen yn pynbna iaka jingialehkai football ha baroh ki 60 constituency ne ka Inter Constituency Football Tournament bad baroh ki nongialehkai yn jied na la ki jong ki constituency. Kane ka jingialehkai kan long na ka bynta ban wanrah iaka jingiajan, ka jingsuk, ka jingiatylli hapdeng ki paid nongshong shnong ka jylla.

Ha kane ka sngi hadien ka jingplie, ka prokram kaba bud pat ka dei ka final 3rd Sniawbhalang Dhar Football Tournament. Kane ka madan ka niam briew haduh 4300 ryngkat ka jaka ieng kali kaba kylluid. Ka don iaka madan ialehkai football, synthetic track.

U Symbud Myntri bad u nongthaw ain ka Nartiang ula ong ba kane ka tournament ki don haduh 1870 ngut ki player ba iashimbynt na ki 70 tylli ki kynhun hapoh ka constituency jong u.

Haka jingiakhun phainal ka Sohphoh SC ka la khur iaka nam lahduh hadien ba ka la pynliem noh iaka Nongkhroh SC da 2-0.

Ka Sohphoh SC kala ioh rah ia ka song pisa kaba 4 lak tyngka ryngkat ka Trophy bad ka kynhun ba wan ka ar ka Nongkhroh SC kala ioh 1 lak 50 hajar tyngka.

La sam ruh iaka khusnam shimet Best Players of the Tournament la ioh da u Sumar Suting, ka nam Best Goalkeeper la ioh da u Embha Rymbai baroh arngut kidei na Sohphoh, katba iaka nam Top Scorer la ioh da u Deciderius Pyrtuh naka Nongkhroh uba la ioh thep haduh 7 goal ha kane ka lympung ialehkai.

Baroh kine ki lai ngut ki rang ialehkai kila ioh rah mar kawei ka Scooty.