Plie u CM Conrad Sangma ia ka Prime Hub Umdihar bad ka Pineapple Processing Unit ha Umdihar

Syllad | The Rising MeghalayaAugust 14, 2023

U Myntri Rangbah ka jylla u Conrad K Sangma haka sngi Nyngkong u la plie paidbah ia artylli ki skhim pynroi kiba kynthup ia ka ‘Prime Hub Umdihar’ kumjuh ia ka ‘Pineapple Processing Unit’ hapoh ka shnong Umdihar, Ri Bhoi District ha ryngkat ka jingiadon lang u MLA ka thain u Dr. Celestine Lyngdoh nalor ka MDC ka Kong Macdaline Mawlong.

Haba kren ha ka jingialang plie u Conrad Sangma u la pynpaw halor ka jingdonkam ban aimynsiem ia ki nongtrei kam lajong ha ki bynta bapher bapher. Kane ka Prime Hub kam dei satia tang na ka bynta ban kyntiew ia ki kam khaii pateng, hynrei kan aibor ruh ia ki kynhun bapher bapher ha la ki jong ki bynta jong ki jingtreikam khnang ba kin nang ioh shuh shuh ia ka jingjop.

Ka jingseng ia ki kam lajong hi ka lah ban sdang lyngba kino kino ki jait kam kiba rit ba ria, kata wat ka jingbuh ia ki dukan ba malu mala ha ki shnong ki thaw, ong u CM Conrad Sangma. U la kdew ruh halor ka jingdonkam ban don ia ki integrated village cooperative societies (IVCS) na ka bynta ban kyntiew ia ka kam bad ban aijingkyrshan ia ki nongshong shnong.

“Ki  IVCS ki don ia ka bynta kasba khraw ban pynkylla ia ki jingmut jingpyrkhat jong ki nongseng kam lajong hapoh ki shnong ki thaw ki jong ngi.Ka Prime Hub kan plie ia ka rynsan bad ki lad ki kabu kiba kynthup ia ki jingai jinghikai, ka jingkyrshan pule bad ki jingbtin lynti na ka bynta ban pyniaid iew ia ki mar ki mata lyngba kine ki sienjam,” ong u Myntri Rangbah ka jylla.

Haba kdew hakaba iadei bad ka Chief Minister’s E-Championship Challenge program, na ka liang u CM u la ong, “Ki jingialeh ha ki kam khaii pateng kumba la thmu ki la kylla long kum ka rynsan kaba la plielad plie lynti hapdeng ki hajar ngut ki nongtrei seng kam lajong.Ki nongiashim bynta kiba don ha ka thup jong ki 100 ngut ym tang ba ki la ioh pdiang ia ki khusnam kiba da ka pisa hynrei ki la iohlad ruh na ka bynta ban shim ram bad kaba pynlong ia ki ba kin ioh ia ka jingjop ha ki kam ki jam ki jong ki.

Nalor kata u la kdew ruh halor ki jingiateh bad ki jaka pule kum ka IIM Kolkata, da kaba ong, “Ka jingiateh ka jong ngi bad ki jaka pule IIM kaba aijinghikai halor ki kam khaii pateng ka pynthikna ba ki nongseng kam lajong ki dei kiba la pynkhreh ha ryngkat ki sap ki phong nalor ka jingioh ia ki lad jingkyrshan pisa.

Haba pynpaw halor kane ka jaka ha Umdihar, u CM u la ong ba ka jingpyniasoh jong kane ka thain sha ki jaka iaew lyngba ki lynti rel ba marjan nalor kum ka khyrdop sha kiwei pat ki ri na ka jylla kan kylla long ka jaka khaii pateng kaba seisoh.

Shuh shuh u CM  u la pyntip ruh halor ka thong bad ka jingnagnud ban kyntiew ia ka Meghalaya sha ka thong ka kot ka ban kot sha ka 10 billion dollar. U la pyntip ruh ba ha ka sngew rakhe ia ka Independence Day, lashai ka sngi 15 tarik Nailar 2023, un pynbna halor ki sienjam ba la shim da ka sorkar ban kyntiew ia ka ioh ka kot bad ka roi ka par na ka bynta ki snem ki ban wan.