Plie u CM ia ka 7th Act East Business Show, kwah pynkhlain jingiadei bad ki ri BBIN bad ASEAN

Syllad | The Rising MeghalayaMarch 26, 2025

U Myntri Rangbah ka Jylla u Conrad K Sangma haka 25 tarik Lber u la plie ia ka 7th Act East Business Show kaba lai sngi kynthih ha ka jingialang kaba la long ha State Convention Centre, Shillong ia kaba la khot pynlong da ka Indian Chamber of Commerce ha ryngkat ka jingiatreilang bad ka Sorkar Meghalaya da ka jingthmu ban kyntiew ia ka jingiadei bad ki ri BBIN bad ASEAN khnang ban kyntiew ia ki kam khaii pateng bad ka ioh ka kot.

Haba kren ha ka jingialang plie, u CM ka Jylla haba pdiang sngewbha ia ki nongmihkhmat na Australia, Bhutan, Germany, Malaysia, Indonesia, Philippines, Thailand bad UAE, u la ong ba ka Meghalaya ka don ia ka jingangnud ban pynkhlain ia ka jingiadei bad ri BBIN bad ASEAN bad bynrap ba ka jingiajan jong ka Jylla bad ka Dubai, BBIN bad ki ri ASEAN kan pynlong ia ka Meghalaya ka jaka pdeng jong ka khaii pateng bad ki lad jingpyniasoh.

U la ong ba ka jingiatreilang, ka jingiasngewthuh jingmut, bad ka jingiadei kaba la pynmih na kum kine ki jingialang ki long ki sienjam ba kongsan ruh na ka bynta baroh bad ym tang ka rynsan na ka bynta ka jingialang jong ki nongseng karkhana, ki nongialam, ki nongthaw polisi bad ki nongsengkam seng jam.

U Conrad u la bynrap ruh ba ka don ka mon sain pyrthei kaba khlain bha kaba pynkhih ia ka mat ban rah shakhmat ia ka thain Shatei Lammihngi bad ong, “Kane ka mon bad ka jingangnud kaba khlain ban kyntiew bad pyniaid shakhmat ia ka thain Shatei Lammihngi jong ka ri ka la wan naduh u Myntri Rangbahduh ka ri haduh ki  Myntri Rangbah ka thain Shatei Lammihngi, ki heh sorkar, ki ophisar bad ki bor synshar khadar jong ka thain.

U la bynrap ruh ba ka Meghalaya ka la sakhi ia ka jingkiew palat ia ka kyrdan jong ka ri ha kine ki khyndiat snem ba la dep namar ki rukom treikam, ki sienjam bad ki polisi kiba la shim ban pynurlong ia ka jingkiew shaphrang. “Ki jingpynbeit jong ki tnad treikam kiba la seng, ka jingiadon bynta jong ki nongshong shnong ha ki kyrdan bapher bapher, ki jingtreikam bapher bapher na ka bynta ki samla nongsengkam jong ngi ki long ki sakhi ia ka jingthmu bad ka thong jong ka sorkar,” u la ong.

“Yn ym lah ban don tang kawei ka Act East Policy na ka bynta ka thain Shatei Lammihngi baroh kawei. Man la ka zone bad man la ki Jylla ha ka thain ka long kaba kyrpang kumta dei ban thaw ia ki thong bad ki buit treikam ba kyrpang na ka bynta man la ki zone ne jylla,” ong u Conrad.

U la ong shuh shuh ba ka Jylla ka angnud ban pynkhlain ia ki jingiatreilang ha ka pyrthei bad khmih lynti ia ka jingiatreilang khamtam ha ki kam aijinghikai ha ka liang ka koit ka khiah, IT, kam jngohkai pyrthei, ka kam rep kam riang bad kiwei kiwei bad pynshlur ruh ia ki kam bei tyngka kum ha ki kam karkhana kiba iadei bad ka rep ka riang, ki jain ki nep, ka koit ka khiah bad ka kam pynmih bording.

Napdeng kiwei pat kiba la aijingkren ha kane ka jingialang ki kynthup ia u Symbud Myntri Rangbah ka Jylla uba khmih ia ka Tnad Commerce & Industries u Bah Sniawbhalang Dhar, u Ambassador ka Germany sha India u Dr Philipp Ackermann, u Ambassador ka Philippines sha India u Josel F Ignacio, u High Commissioner ka Malaysia sha India u Dato Muzafar Shah Mustafa, u Myntri bad  Deputy Chief of Mission kaThailand sha India u Thirapath Mongkolnavin bad kiwei kiwei.

14 tylli ki ri ki wan iashim bynta ha kane ka 7th Act East Business Show. U Myntri Rangbah ka Jylla lem bad kiwei kiwei ki riew rangbah ki la plie paidbah ruh ïa ka jingpyni nam ba la buh ha katei ka jaka. Kane ka business show kaba lai sngi kan kynthup ïa ki jingïalang round table, ki jingïalang B2B bad B2G, ki jingïakren halor ka jingpynkupbor ia ka roi ka par lyngba ka jingshem thymmai bad ka teknoloji ha Meghalaya bad ka rep ka riang, ka jingri jingdup, ka jingpynkhreh bad shna marbam, ka leit ka wan, ka kam jngohkai pyrthei bad ka kam pdiang sngewbha ha ka thaiñ Shatei Lammihngi ka Ri India.