Plie u CM ia ka Academic Block bad hostel ki kynthei bad shynrang jong ka Captain Williamson Sangma Govt College

Syllad | The Rising MeghalayaMarch 5, 2024

U Myntri Rangbah ka Jylla u Conrad K Sangma ha ka 4 tarik Lber, u la plie paidbah ia ka Academic Block bad ia ki hostel ki khynnah kynthei bad shynrang jong ka Captain Williamson Sangma Government College ha ka jingialang kaba la long hapoh kane ka jaka pule.

Haba aijingkren ha ka jingialang shibynta ka jingleh burom ia ka lyngkhuh sngi iap kaba phra jong u Late PA Sangma, u Conrad Sangma u la ong, “Ka dei ka jingiohi jngi bad ka jingngeit jong u Late PA Sangma ban kyntiew ia ka pule puthi ha ka jylla ha kaba u la buh ruh ia u Mawnongrim na ka bynta kane ka college ha u snem 2008 ha kaba dei tad haduh mynta ba la lah ban poi sha kane ka thong jong ka jingangnud bad ioh ban plie ia kane ka jingtei na ka bynta ki jingpule kiba kham shalor na ka bynta ki samla bad ki nongshong shnong jong ka South Garo Hills.”

Nalor kata u la ong ruh ba ia ka thong bad ka jingiohi jngai ia kaba la pynkhreh da ka Tnat pule puthi ha kine ki san snem ba ladep la lah ban pyniaid shakhmat ha kine ki sngi kiba mynta. “Nga thikna ba ka Tnat pule puthi kan sakhi ia ki jingkylla kiba khraw ha kine ki sngi ki snem ki ban wan hapoh ka jingialam ba stad jong une u Myntri ka Tnat pule puthi ba mynsaw,” ong u CM.

U CM u pyntip ruh ba ka pule puthi barabor ka don ha thong kaba hakhmat eh jong ka sorkar, bad kumta ka sorkar ha u snem 2024 ka la kyntiew ia ka jingpang tyngka na ka bynta ka Tnat pule puthi na ka T.27 klur sha ka T.350 klur.

Ha kajuh ka por u CM u la ong ruh ba ka Sorkar shen kan sa mynjur ia ka jingtyrwa ban sdang noh ia ka Science bad Commerce stream hapoh ki college sorkar ha Sohra, Williamnagar bad Baghmara.

U la pyntip ruh ha ka jingialang halor ki prokram kam pynroi bad ki polisi na ka bynta ka South Garo Hills ha kaba ka thong kaba hakhmat eh ka long ban wanrah ia ka projek na ka bynta ka Civil Hospital ha Baghmara. “Na ka liang ka Tnat DoNER ka la mang T. 15 klur na ka bynta ban pynkha ia ka jingtei na ka bynta 150 jingthiah hapoh kane ka hospital nalor T.5 klur la mang da ka sorkar jylla na ka bynta ban tei ia ka quarter na ka bynta ki doktor, ki nos bad ki staff.

Ia kane ka jingialang la ia don lang ruh u Myntri ka Tnat pule puthi u Rakkam A Sangma, MLA Baghmara u Kartush R Marak, MLA Amlarem uba dei ruh u Chief Advisor ka sorkar Jylla u Bah Lahkmen Rymbui, u Chief Secretary ka Jylla u Bah DP Wahlang nalor kiwei pat.