Plie u CM ia ka building ka ophis u DMHO bad ka Trauma Centre ha Nongpoh

Syllad | The Rising MeghalayaAugust 10, 2024

U Myntri Rangbah ka Jylla u Conrad K Sangma ha ka 9 tarik Nailar u la plie ia ka building kaba thymmai jong u District Medical & Health Officer, Nongpoh ha Ri Bhoi District ha ka jingiadon lang ka Myntri ka tnad ka Koit ka Khiah ka Kong Ampareen Lyngdoh bad u MLA ka thain uba dei ruh u Chairman ka Meghalaya Health System Strengthening Project u Bah Mayralborn Syiem.

U CM haba aijingkren ha ka jingialang u la pynpaw ba na ka liang ka Sorkar ka la pyrshang ia baroh ki lad ki lynti ban kyntiew bad pynbha ia ki jaka aijinsumar, kata la ka long ha ka liang ki jingtei, ka jingpynbiang ia ki tiar ki tar jingsumar bad ka jingdon jong ki nongtrei.

“Ka la don ka jingpynbha hynrei ki dang don bun ia kiba dang dei ban leh khamtam hapoh ki shnong ki thaw,” u la ong.

Haba pyntip ba ka sorkar ka la pynkhreh kyrpang ia ka mangtyngka ban pynbha bad pynjanai ia ki jingtrreikam ka tnat ka koit ka khiah, kaba kynthup halor ka jingthaw ia ka board thungkam ba kyrpang, u Conrad u la ong, “Ka board thungkam ba kyrpang ka laiarap ia ka tnad ban pynjanai ha ka jingthngkam ha ka kyrdan jong ki doktor bad ki nos.”

Ia kane ka building kaba thymmai la shna ha ka jinglu kaba T.18.4 klur.Ia kane ka building yn pyndonkam na ka bynta ka ophis treikam bad ia ka trauma centre.

Na ka liang u CM u la pyntip ruh ba ka sorkar Jylla ka la mang ruh na ka bynta ka jingshna pynbha ia ki PHC bad ki CHC kiba don ha kylleng ki jaka ha ka Jylla.

Nalor kata u la pyntip ruh ba haduh 148 tylli ki jaka sumar ki la don hapdeng ka jingshna pynbha bad maramot, kata nalor ka jingkyntiew kyrdan ia ki Civil Hospital ha ki District bapher bapher.

Ki laitylli ki district hospital kiba dang pynkiew kyrdan mynta ki long ka Tura, Shillong bad ka Jowai Hospital.