Plie u CM ia ka Captain Williamson Sangma State University; yn pynkha sa ia ka Shillong Campus

Syllad | The Rising MeghalayaJanuary 13, 2025

U Myntri Rangbah ka Jylla u Conrad K Sangma ha ka 13 tarik Kyllalyngkot u la plie paidbah ia ka State University kaba nyngkong eh ka Jylla, ka Captain Williamson Sangma State University ha ka jingiadon lang u Lamphang ka Iingdorbar thaw ain ka Jylla u Thomas A. Sangma, Symbud Myntri Rangbah u Bah Sniawbhalang Dhar, Myntri ka Tnad pule puthi u Rakkam Sangma, Myntri ka Tnad Bording u Abu Taher Mondal bad kiwei kiwei.

Ia ki jingtei jong kane ka University la plie ha u Kyllalyngkot 2023. Ha u Jylliew 2018, la ai ka jingmynjur ban tei ia kane ka skulbah ha ka jingmang kaba kot T.16.96 klur. Ia kane ka skulbah la ai ha ka kyrteng jong u Myntri Rangbah ba nyngkong eh ka Jylla u Captain Williamson A Sangma.

Ha u snem 2011, ka jingtei ia kane ka University ha kaba nyngkong ka long kum ka Captain Williamson Sangma State Technical University ban pyniasoh ia ki Technical College hapoh ka jylla. Hynrei ha u snem 2022, ka sorkar jylla ka la pynkylla noh ia ka kyrteng sha ka Captain Williamson Sangma State University khnang ban pynthikna ba baroh ki technical bad non-technical college kin ioh ban pyniasoh.

Haba shim ia kane ka jingplie ia ka University kum ka sngi sah jingkynmaw, u Myntri Rangbah u la ong, “Kane ka University kan ym shakri tang ha kaba iadei bad ki jingpule kiba kham shalor (Higher Education) hynrei kan kyntiew ruh halor ki kam wad bniah (Research) bad ki buit treikam bathymmai (Innovation) ka ban wanrah ka jingkylla ha ka liang ka pule puthi hapoh ka Jylla.”

U la ong ba ka jingpyntreikam ia kane ka University ka dei ka jingkular jong ka sorkar na ka bynta ki nongshong shnong ka jylla. “Ha kine ki 50 snem ka jingiaid lynti ka jylla kam pat shym la don ia la ka jong ka University. Ka jingthaw ia ka University ba la pyniaid hi da ka jylla ka dei ka jingpynshisha halor ka jingshim khia jong ka sorkar ban kyntiew ha ka liang ka roi ka par ha ka pule puthi,” ong u Myntri Rangbah.

“Kane ka University kan ym dei tang ka kyrteng; Ka dei ka jingkular. Ka jingkular jong ka jingkyrmen, ka jingkiew shaphrang bad ki lad ki lynti kiba bun bah na ka bynta ki nongshong shnong ka Meghalaya,” u la bynrap.

Ha kajuh ka por u Myntri Rangbah u la pynbna ruh ba ka sorkar kan sa pynkha sa ia ka Shillong compus jong ka University ka ban iarap bad pynsuk ia ka jingtreikam bad ia ki samla pule kiba dei na Rilum Khasi bad Jaintia.

“Kane ka University kan sdang treikam naduh mynta bad baroh ki college hapoh ka jylla ki lah ban jeid ban aplai ban pyniasoh bad la ka jong ka University,” u la pyntip da kaba bynrap ba ka jingpyniasoh bad la ka jong ka University kan pynthikna ba ki samla pule kin ym donkam shuh ban hap lei ban iakhun ia ka Common University Entrance Test (CUET) na ka bynta ban leit pule ia ki course under-graduation and post-graduation hapoh ki college kiba la pyniasoh bad ka Captain Williamson Sangma State University.

U la pyntip ruh ba ka CUET kan treikam tang ia ki college kiba iasoh bad ka skulbah North Eastern Hill University (NEHU), Shillong.

“Nga kyntu ia ki college ba kin shim ia kane ka kabu bad pyniasoh bad ka Captain Williamson Sangma State University,” u la ong da kaba bynrap ba ka sorkar jylla kan aijingiarap ia ki jaka pule kiba pyniasoh ha ki rukom katkum ka jinglah na ka bynta ban pynthikna ba kin lah ban kiew shaphrang.

Kiwei pat kiba la aijingkren ha kane ka sngi ki kynthup ia u Symbud Lamphang ka iingdorbar thaw ain u Timothy D Shira, ki MLA kiba kynthup ia u Sanjay A Sangma, Ian Botham K Sangma, Subir Marak, Sengchim Marak, Jim Sangma, Limison Sangma, Marthon Sangma, u Vice Chancellor University, Prof. Vasanthi Vijayakumar, CEM ka GHADC Albinus Marak, Deputy CEM Nikman Marak nalor kiwei pat.

Lah ban kdew ba ka University Grants Commission ka la ithuh ia ka Captain Williamson Sangma State University katkum ka kyndon section 2(f) jong ka UGC act 1956 katkum ka shithi jong ka 6 tarik Nohprah 2024.