Plie u CM ia ka Indoor Stadium ha Nongkseh, yn mang 2.1 klur ban shna ia ka madan football

Syllad | The Rising MeghalayaDecember 14, 2023

U Myntri Rangbah ka jylla u Conrad K Sangma haba kren ha ka jingplie ia ka Nongkseh Indoor Stadium haka 13 tarik Nohprah, u la ong ba ka sorkar jylla ka la lah ban tei ia buntylli ki Indoor Stadium bad ki Stadium ha ka jylla bad ba kan dang bteng ban tei shuh shuh khnang ban kyntiew ia ki sap ki phong jong ki samla ialehkai.

U CM u la ong ruh, “Kila don shibun tylli ki jingtei kiba la iaid shakhmat hynrei ngin sa nang mang shuh shuh ban tei ia kaba ngi la dep ban pynkhreh ia ka thup ban tei sa kumba 40 tylli ki jingtei ha kylleng ka jylla bad ki kam ki jam kin sa sdang noh shen.

U Sangma u la pyrto ruh ia u MLA barim ka thain u Bah Hamletson Dohling uba la trei shitom na ka bynta ban lah ban pynurlong ia kane ka jingthmu ban wanrah ia kane ka Indoor Stadium ha kane ka jaka bad kyntu ruh ia ki nongshong shnong ban pyndonkam ia kane ka jaka ban pynshlur ia ki samla ha ka lynti kaba dei.

Nalor kata u la ong ruh ba u sngewkmen shibun ban pynbna na ka bynta ban mang haduh T.2.1 klur ban shna ia ka stadium hapoh ka madan football ha Nongkseh.

Kumjuh ha kaba iadei bad ka jingthmu ban pynlong ia ka Meghalaya Games ha Tura, u CM ula ong ba ula dep lum dang shen ia ka jingialang ha Tura ban pynlong iaka Meghalaya Games bad ka jingpynkhreh kala long kaba iaid beit kaba kynthup naduh ka jaka sah bad kiwei kiwei ki jingdonkam.