Plie u CM ia ka ‘Integrated Programme’ ban kyntiew ia ki lad sengkam bad ka roi ka par

Syllad | The Rising MeghalayaOctober 17, 2023

U Myntri Rangbah ka jylla u Conrad K Sangma haka sngi ba Ar, u la plie ia ka ‘Integrated Programme’ bad aiti ruh ia ki cheque lyngba ka skhim CM Elevate kum ka dak ka jingpynpaw ia ka jingkut jingmut ban kyntiew ha ka liang ka sengkam sengjam bad ka roi ka par ha ka jylla ha ka jingialang kaba la long hapoh District Library Auditorium, Mynthong, Jowai, West Jaintia Hills District.

Ha kane ka prokram la ia don lang ruh ka Kong Santa Mary Shylla, MLA, Sutnga Saipung,  Wailadmiki Shylla, MLA, Jowai, Lahkmen Rymbui, MLA, Amlarem nalor u CEM ka  Jaintia Hills Autonomous District Council (JHADC)  u BahThombor Shiwat bad kiwei kiwei.

Haba kren ha ka jingialang kum u Kongsan u CM ka jylla u la ong ba kane ka prokram ka pynpaw ia ka thong jong ka jylla na ka bynta ka lawei kaba kiew shakhmat ha ka liang ka ioh ka kot bad ka roi ka par lyngba ka jingpynkupbor sha ki samla ha ka liang ka ioh kam ioh jam, ka jingiatylli hapdeng ki nongshong shnong bad ka jinglah ban pynneh pynsah ia ka jingkhuid jingsuba jong ka mariang.

U CM u la ong; “Nga la ju iai ban ba ki kam pynroi kim long ki bym pat biang lada baroh ki nongshong shnong bad ka imlang ka sahlang ha ka jylla kim pat lah ban iaid shakhmat ryngkat lang ha ka liang ka ioh ka kot bad ka roi ka par. Ka CM Elevate ka dei ka prokram na ka bynta ban iarap ia ki nongsengkam sengjam lajong, bad ha kine ki san snem kiba la dep ngi la lah ban kyrshan haduh 3000 ngut ki nongseng kam lajong ha kiba bun rukom.”

Nalor kata u la ong ruh ba ngi don ia ki projek na ka bynta ki nongshong shnong, na ka bynta ki self help group, na ka bynta ki kynhun kiba iadei bad ki kam ialehkai sport bad na ka bynta kiwei pat kiba kwah ban long ki nongtrei kam lajong.

U la ong ruh ba ka skhim na ka bynta ka jingshna ia ki Cinema Hall ka long ban pynthikna ba baroh ki district ki dei ban don kawei ka cinema hall ia kiba yn pyniaid da ki kynhun shimet bad ba na ka liang ka sorkar kan long ka nongkyrshan lem. U la ong ruh ba ka donkam ban don ia ki convention center ha manla ki district headquarter.

Shuh shuh u la ong ruh ba ka jingkyntiew ia ka ioh ka kot bad ka jingpynkup bor ia ki kynthei ka long kaba kongsan, bad ki self help group ki dei kawei na ki lad ba khrawbor ki ban aibor bad kyntiew ia ka ioh ka kot hapdeng ki kynthei. Ha kaba iadei bad ki prokram ka YESS Meghalaya u CM u la ong, “Na ka liang ka sorkar kan ai ia ka jingkyrshan kaba haduh T.1lak na ka bynta ban leh bad seng ia kino kino ki kam. Napdeng ki 1155 ngut ki samla kiba ngi la aijingkyrshan ha ka kylla kaba nyngkong ia ka kynhun ba nyngkong ha ka jylla, ha kaba tang ka Jaintia Hills ka la don haduh 389 tylli ki kynhun kiba la ioh jingmyntoi, kata kaba mut ha ka jylla baroh kawei ka Jaintia Hills ka la ioh ia ka jingkyrshan kaba bun eh lyngba ka YESS Meghalaya. La sam haduh kumba T. 1 klur hapdeng kine ki kynhun.”

Na ka bynta ban pynneh ia ka jingjyrngam ha ka mariang, u Conrad u la ong ba kino kino ki nongshong shnong, ki kynhun ne ki riew shimet kiba kwah ban aijingiada ia la ki  jong ki khlaw ki btap, ka sorkar Meghalaya kan pynioh ia ka jingiarap kaba T.15,000 na ka bynta shi hectare ka jingheh ka jaka khnang ba kan ym don ka jingpynthut ia kine ki khlaw ki btap.

U la ong ruh ba haduh 40,000 heactare ki jaka khlaw ki la don hapoh ki jingai jingiada ne ‘protected areas’ hapoh jong ka PES program, bad na ka liang ka sorkar ka la pynioh haduh T.40 klur ha ka rukom jong ki cheque bad cash sha ki nongshong shnong ba kin aijingiada ia kane man la u snem.

Ha kane ka prokram la sam ruh ia ki 37 tylli ki cheque, Yess- 17, Self-Help Groups (SHGs) -10 bad  Green Meghalaya-10 katba ka pisa ba la pyllait baroh ka long T. 4,90,000 na ka bynta ka YESS program, bad T. 66,00,000 sha ki SHGs bad T. 54,09,058 sha ki kynhun PES.