Plie u CM ia ka jingrakhe dap 100 snem ka shnong Chutwakhu, pyrto ia ki nongialam barim

Syllad | The Rising MeghalayaJanuary 10, 2025

U Myntri Rangbah ka Jylla u Conrad K Sangma ha ka 10 tarik Kyllalyngkot u la plie paidbah ia ka jingrakhe dap 100 snem (Centenary Jubilee) jong ka shnong Chutwakhu, West Jaiñtia Hills District.

Haba pyrto ia ki jingnoh synniang jong ki nongialam barim ka Chutwakhu, u CM u la ai khublei kyrpang ia ka Dorbar Shnong ka Chutwakhu halor ka jingkynjoh sha une u mawmer uba 100 snem, kaba rakhe ruh ia ka mynsiem jong ka jingiatylli hapoh ka shnong ka thaw na ka bynta ban kyntiew ia ka roi ka par.

U Conrad u la shim ruh ia ka shnong Chutwakhu kum kaba la kiew shaphrang ban ialam lynti ha ka ban pynshlur ia ka jinglong nongialam hapdeng ki kynthei bad ka jingiashim bynta na ka bynta ka bha ka miast ha ka imlang ka sahlang naduh ki snem 1931.

U la ong ba ka Chutwakhu ka la plielad ruh na ka bynta ki kynhun seng jong ki samla ba kin lah ban kiew shaphrang naduh ki snem 1934, bad bynrap ba ka jingiadon bynta lang jong ki rangbah, ki kynthei bad samla hapoh ka imlang ka sahlang ka la long da shisha ka nuksa kaba paka tam halor ka bor jong ki nongshong shnong.

Haba kren halor ka jingkongsan jong ki shnong ki thaw, u CM u la ong ba ka jingkhlain jong ka jylla Meghalaya ka shong ha ki shnong ki thaw bad u kyntu ruh ia ki nongshong shnong ba kin iatreilang ryngkat ryngkat bad ka sorkar khnang ban nanglah shuh shuh ban kyntiew ia ka roi ka par hapoh ka District bad ka Jylla hi baroh kawei.        

Ha kane ka sngi la ia don lang ruh u Symbud Myntri Rangbah u Bah Snaiwbhalang Dhar, ki MLA kiba kynthup ia u Bah Wailadmiki Shylla, Bah Lahkmen Rymbui bad kiwei kiwei.