Plie u CM ia ka jingtei ba pynkylla dur bad pynitynnad ia ka IGP Point, Shillong

Syllad | The Rising MeghalayaNovember 15, 2024

U Myntri Rangbah ka Jylla u Conrad K Sangma ha ka 15 tarik u Naiwieng u la plie paidbah ia ka jingtei kaba pynkylla dur bad pynitynnad ia ka bynta jong ka IGP Point ha Shillong kaba dei ruh shibynta jong ka sienjam ban pynkylla dur ia ki surok ia kaba la sdang naduh u bnai Lber 2024.

Haba aijingkren ha ka jingialang, u Conrad u la ong ba watla kane ka jingpynkup dur thymmai ka dei ka jaka kaba rit, hynrei ka dei pat ka sienjam ha ka jingpyrshang ban pynkup ia ka dur thymmai ba itynnad ia ka nongbah Shillong bad ban pyntip ruh ba bun ki jaka ki sa mih kiba kum kine ki jingtei pynitynnad.

U Myntri Rangbah u pyntip ruh ba na ka liang ka sorkar ka la dep ban rai na ka bynta ban tei ia ka 4 Star Hotel hapoh Orchid Polo bad ba ka jingtei kan sa sdang noh shen.

“Ngin pyrshang ban pyndonkam ia baroh ki nongkynti bad ki jaka ba lait kiba ka sorkar ka don bad ha kine ki khatar bnai ki ban wan la khmih lynti ba kan don ka jingpynkylla dur kaba khraw ha ka nongbah Shillong,” u la bynrap.

Nalor kata u CM u la pyntip ruh ba ka Integrated Command Centre ka la don ha ka bynta kaba jan dep artad bad ia kaba yn sa plie noh shen.

Kiwei pat kiba la ia don lang ha kane ka jingialang ki kynthup ia u Symbud Myntri Rangbah u Bah Sniawbhalang Dhar lem bad kiwei kiwei ki heh ophisar.

Hadien na ka liang u Myntri Rangbah ha ryngkat ki heh ki hain ki la iaid lyngba na kane ka jaka shapoh Secretariat da kaba pyndonkam ia ka walkway.