Plie u CM ia ka Meghalaya Youth League 2024 ban kyntiew ia ka phutbol ha ka Jylla

Syllad | The Rising MeghalayaJuly 13, 2024

U Myntri Rangbah ka jylla u Conrad K Sangma ha ka 12 tarik Naitung ula plie ia ka “Meghalaya Youth League 2024” ha ka jingialang kaba la long ha State Convention Centre ha ka jingiadon lang ki nongkitkam na ka Meghalaya Football Association kaba kynthup ia u President Bah Hamletson Dohling, Sunesh Syiem, Secretary lem bad kiwei pat ki dkhot nalor ki nongialam jong ka  Meghalaya Olympic Association kiba kynthup ia u President Bah John F Kharshiing.

Ha ka jingkren u Conrad u la ong, “Ka dei ka sienjam kaba khraw ba la shim da ka Meghalaya Football Association da kaba lah ban pynlong ia kane ka “Meghalaya Youth League 2024,” ban plielad ia ki samla donsap ba kin ioh lad ban mih rynsan hapoh la ka jong ka Jylla, ka thain bad ka Ri hi baroh kawei.

“Haba u President ka MFA u la wan iakynduh ia nga, ngam shym la kyntait satia hynrei ban ai ka jingmynjur bad ka jingkyrshan jong ka sorkar ia ka Association namar ka Meghalaya Football Association ka dei ka kynhun kaba biang bad kaba la noh synniang shibun na ka bynta ban kyntiew ia ka kam ialehkai bad ia ki sap ki phong jong ki khynnah ialehkai ka Jylla,” ong u CM.

“Ka dei ka jingkhmih lynti kaba don jingkyrmen ba ki samla jong ngi kin lah ban tei ia ka lawei ka jong ki na ki kam ialehkai bad kum ki nongialehkai kiba tbit, bad na ka liang ka sorkar kan iai bteng ban bei tyngka na ka bynta ka lawei jong ka Jylla,” ui la ong da kaba bynrap halor ki sienjam kiba ka sorkar ka thmu ban kyntiew ia ki kam ialehkai ha ka Jylla.

Nalor kata u la iai ban ruh halor ka jingkongsan na ka bynta ki jingbei tyngka bad ban pynleit jingmut na ka bynta ki khynnah bad samla namar kiba don don ia ka bor ha kaba donkam ban ialam ia ki ha ka lynti kaba dei.U la ong ruh ba ka long kaba donkam ban pynthikna ba ka jingbtin lynti ia ki khynnah don sap khnang ba kin lah ban pynleit jingmut ia ka thong kaba ki angnud, bad dei na kane ruh ka daw ba ka sorkar ka la pynlong laitylli na ki laitylli ki Meghalaya Games ha kine ki hynniew snem kiba ladep.

U CM u la bynrap ruh ba ka sorkar ka la thaw shuh shuh ia ki jingtei kiba iadei bad ka sports ha kine ki san snem kiba la dep bad ba kan dang iai bteng ban tei shuh shuh ia kiba kum kine ki jingtei khnang ba kan long ka jingmyntoi kaba khraw na ka bynta ki khynnah samla kiba donsap.

Kane ka League kan sdang ha ka 20 tarik mynta u bnai da ka jingiashim bynta jong ki Associations bapher bapher na kylleng ki bynta jong ka jylla bad ia kane ka League la phiah ha ki ar bynta Sub Junior kiba hapoh ka 14 snem ka rta bad ka Junior kiba hapoh jong ka 16 snem ka rta bad la pynwandur ia kane ka League ha ka Inter District ha kylleng jong ka jylla Meghalaya ka ban kynthup ia baroh 20 tylli ki District Association kiba pyniasoh bad ka Meghalaya Football Association.

Ka East Zone ka kynthup ia ka Shillong Sports Association, Sohra Sports Association, Riwar Mihngi Football Association, Ri-Bhoi District Sports Association bad Western Ri-Bhoi District Sports Association.

Ka West Khasi Hills Zone ka kynthup ia ka Tyrsad Area Sports Association, Eastern Border Sports Association, Eastern West Khasi Hills (Pyndemumiong Sports Association), Mawkyrwat District Sports Association, Nongstoin District Sports Association bad Mawshynrut Sports Association.

Ka Jaintia Hills Zone ka kynthup ia ka West Jaintia Hills District Sports Association, East Jaintia Hills District Football Sports Association, Amlarem Sports Association, Saipung Block Sports Association bad Laskein Sports Association.

Ka Garo Hills Zone ka kynthup ia ka District Sports Association ka Tura, Williamnagar District Sports Association, District Sports Association North Garo Hills bad Baghmara District Sports Association.

Ka jingthmu ba kongsan ban pynlong ia kane ka League ka long ban wad ia ki sap ki phong jong ki nongialehkai kiban mihkhmat ia ka jylla ha ka National Football Championships bad la khmih lynti ruh ba yn lah ban pynlong ia kane ka League man la ka snem.