Plie u CM ia ka ophis thymmai ka Betasing C&RD Block ha SWGH

Syllad | The Rising MeghalayaJuly 26, 2024

U Myntri Rangbah ka Jylla u Conrad K Sangma ha ka 25 tarik Naitung u la plie paidbah ia ka jingtei bathymmai jong ka Betasing C&RD Block ha South West Garo Hills ha ryngkat ka jingiadon lang u Myntri C&RD Block u Abu Taher Mondal, u MLA Sanjay A Sangma, Ian Botham K Sangma, Subir Marak bad kiwei kiwei.

Haba kren ha ka jingialang u Conrad u la pyntip ba ka sorkar ka don ia ka jingkut jingmut bad ka jingangnud ban kyntiew ia ki jingtei ha ki thain nongkyndong khnang ban pynthikna ba kin lah ban ai ka jingshakri kaba pura sha ki paidbah.

U la ong ruh, “Kum ka sorkar ngi don ia ka jingkut jingmut ban kyntiew ia ki jingtei ha ki thain nongkyndong khnang ban pynbeit ryntih ia ka rukom aijingshakri sha ki paidbah. Da kane ka jingthmu, ngi la shna ia ka block ophis kaba thymmai, ngi la pynthymmai bad shna ia ki Primary Health Centers (PHC) bad ki Community Health Centers (CHC) bad kyntiew kyrdan ia ki Government Lower Primary School ha baroh kawei ka jylla.”

Nalor kata u CM u la pyntip ruh ba ka sorkar ka la bei pisa bha na ka bynta ki jingtei ha ki thain nongkyndong, bad haduh jan kumba T.120 klur la mang halor ka jingshna ia ki ophis jong ki block bathymmai . “Haduh jan kumba 60 percent na kine ki block ophis bathymmai yn sa lah ban pyndep bad plie noh mynta u snem,” u la bynrap.

Ban pynjanai ia ka jingtreikam bad ka jinglah ban ioh ia ki block ophis, u CM ka Jylla u la bthah ia u Deputy Commissioner ka South West Garo Hills ban ai ia ki jingtyrwa na ka bynta ban pyniar bad pynbha shuh shuh ia ki jingtrei.

Shuh shuh u la bynrap ruh da kaba ong “Ngi kwah ban pynthikna ba haba ki briew ki wan mih sha ki block ophis kin ioh ia ka jaka kaba suk ban shong ban ap. Ka jingmut baroh kawei ka long ba ki briew ki dei ban ioh ia ka jingshakri kaba biang  khlem kano kano ka jingeh.  Ka jingpyrshang ka jong ngi ka long ban shakri ïa ki paidbah.”