Plie u CM ia ka tamasa Tri Hills Ensemble ban pynpaw ia ka kolshor ka jylla sha ka pyrthei

Syllad | The Rising MeghalayaNovember 22, 2024

U Myntri Rangbah ka Jylla u Conrad K Sangma ha ka 21 tarik Naiwieng u la plie paidbah ia ka tamasa ‘Tri Hills Ensemble’ ha ka jingiadon lang u Myntri ka Tnad Arts & Culture u Bah Paul Lyngdoh bad u heh sorkar na Wales sha India u Mitchell Theaker hapoh U Soso Tham Auditorium, Shillong.

Kane ka tamasa kaba lai ba la pynlong ha ka jylla ka thmu ban pyni sha ka pyrthei ia ka jingriewspah ha ki kam shna bad thain kti bad ha ka kolshor jong ki laitylli ki kynhun jaidbynriew ka Jylla, kata ki Khasi, Jaintia bad Garo.

“Kane ka tamasa  ka dei ka jinglehkmen ia ka kolsor ka jong ngi, ka imlang sahlang bad ki briew jong ngi. Lyngba kane ka tamasa ngi thmu ban pyni sha ka pyrthei ia ka jingriewspah ka jylla bad ka jingithuh ia ka jinglong kyrpang ki briew jong ngi,” ong u Myntri Rangbah ha ka jingkren.

Haba kren halor ka jingkongsan jong ka kolshor, u CM u la ong, “Ka kolshor ka don ia ka bor kaba khraw namar ka pyniasoh ia ngi bad ka mynnor bad ka tynrai ka jong ngi, bad kaba pyniapher ia ngi na kiwei pat. Kum kawei na ki bor, ngi pyrshang kum ka sorkar ban pyndonkam ia kane ka spah na ka bynta ki jingthmu kiba tei.”

U CM u la ong ruh ba ka sorkar ka la pyntreikam ia ki sienjam ban ai mynsiem ia ka pateng kaba mynta ba kin sngew sarong ia la k jong ka kolshor bad ia ki jingpher na kawei ka thain sha kawei pat hapoh ka jylla. U la pyntip ka la shna ia ki prokram ki ban kyntiew ia ka kolshor, ki jingshna bad thain kti, ka put ka tem, ka thoh ka tar bad halor ki jingtip shaphang ka tyllong ka jingstad jingshemphang jong uba rim ba jah.

“Ngi kwah ba ki briew jong ngi kin sngew sarong na ka bynta la k jong ka kolshor, ka riti dustur, ka rukom im rukom beit bad ha ka ktien ka thylliej,” u la bynrap.

U l pyrto ruh ia ka Tnad Arts & Culture halor ka jingshim ia ki sienjam ban pynkylla dur ia ka Captain Williamson Sangma Museum, bad pynshlur ia ka Tnad ba kan pyndonkam ia ka technology na ka bynta ban kyntiew ia ka jingshemphang kaba kham bha halor ki bynta bad ki jingim bapher bapher jong ki briew hapoh ka jylla. “Ki jingïalang bad ki tamasa jong ngi ki rakhe ia ka jingriewspah jong ka jylla,” u la pynpaw.

U la kyntu ruh ia ka Tnad pule puthi ban pynlong kongsan ia ki jaka pule ba kin ialam ia ki khynnah sha kane ka museum bad ban tip shaphang ka jinghiar pateng kaba riewspah jong ka jylla.

Haba kren halor ka Chief Minister’s Research Fellowship program, u la ong ba 50 ngut ki riew shemphang la dep ban jied bad kiba la iaid shakhmat ban pynkhreh ban buh jingthoh ia ki mat bapher bapher kiba don jingiadei bad ki briew kumjuh bad k kolshor ka jylla. “Ka jinglong jong ngi ka dei ka kolshor jong ngi, ka jingsarong jong ngi, ka long kaba donkam eh ba ngin pyni bad pynneh pynsah ia ka jingstad jong ki kpa tymmen jong ngi ha ki liang bapher bapher, bad ban rah ia ka sha ka kyrdan ba pawkhmat ha ka pyrthei.”

Ha kane ka sngi u CM u la pyllait ruh ia ka web portal jong ka Arts & Craft Village bad pynbna ruh ia ki jingai khusnam bad jngithuh ia ki riew pawkhmat ha ki kyrdan bapher bapher.

Literary: Dr. Kynpham Sing Nongkynrih & Janice Pariat
Tribal Museum: Kyntiewbor War
Tribal Entrepreneurship: Dasumarlin Majaw and D Kharbuli
Woodcraft: Gilford Pde
Film Making: Pradip Kurbah, Dominic Sangma and Simi Kongthiang
Fashion and lifestyle: Angelia Marwein
Performing arts: Steve Jyrwa, winner Dance India Dance
Indigenous cuisine: Mei Ramew Café
Bamboo Craft: Ricky Kynter and Bandap Dewkhaid Shillong Bamboo

Nalor kane la ioh ruh ban pyllait ia k kot kaba kyrteng “A Synthesis of Rhythm & Art”, kaba buh jingthoh ia ki jingshad tynrai jong ka Meghalaya. Kane ka kot ka dei kaba la prat lynti da ka Sankardev College, Shillong ha ryngkat ka jingiatreilang bad ka Tnad Arts & Culture. Kawei pat ka kot ba l pyllait ka dei kaba kyrteng “U Spor na Thwei Pyrkhat” ba la thoh da u Banjop Leo Gregory Kharmalki bad ka KOT (Khasi Old Testament) ba la thoh da u Bah Raphael Warjri.