Plie u CM iaka kompeni iMerit ba pyndonkam iaka AI teknoloji ha Shillong IT Park 

Syllad | The Rising MeghalayaAugust 10, 2024

U Myntri Rangbah ka jylla u Conrad K Sangm ha ka 9 tarik Nailar, u la plie paidbah ia ka kompeni iMerit ka ban pyntreikam ia ka AI teknoloji ha Shillong IT Park, Umsawli ha ka jingiadonlang ka Radha Basu, kaba dei ka nongseng bad CEO ka iMerit.

Haba pynpaw ba ka jingjied ia ka nongbah Shillong kum ka jaka kaba biang tam ban seng ia ki kompeni na ka bynta ka jingtreikam ia ki IT, u CM u la ong, “Ka sorkar ka la sdang ia ki lad jingiarap ban thaw ia ki rukom treikam ki ban aijingshakri lyngba ka IT ban kyntiew ia ka roi ka par. Ka sorkar ka la pyntreikam ruh ia ki projek ban pynthikna halor ka jingpyniasoh ia ki kor internet kiba set bad ba lah ban shaniah ha baroh kawei ka jylla.”

Haba kren halor ki kam synshar ba la pyniaid da ki jingkhein jingdiah ne data ka ban sa shim ia ka bynta kaba kongsan ha ki jingtreikam, u Conrad u al ong, “Ki jingkhein jingdiah ki long kawei na ki jingdonkam ba kongsan ba ka sorkar ka la pyndonkam ban shim ia ki rai kiba kongsan ki ban wanrah jingmyntoi shibun lyngba ki jingdon jingem kiba duna.”

Nalor kata u la pyntip ruh ba ka sorkar ka la pyndonkam da ka teknoloji na ka bynta ban pynbeit ryntih ia kiba bun ki jingtreikam bapher bapher, kata kum ha kaba peit bniah ha ka liang ka koit ka khiah jong ki longkmie bad ki khynnah, ban pynkhreh ne shna map halor ki jingthung jingtep bapher bapher, ka jingdon jong ki khlaw bad ki mrad ki mreng ha ka Jylla. “Ka bynta jong ka teknologi ka dang wad na ka bynta ki lad ki lynti kiba stad bad ngi kum ka sorkar ngi pynshlur ia ki kompeni ban bei tyngka bad wad ia ki lad ki lynti kiba ka jylla ka lah ban ai”.

“Ka teknoloji ka dei u budlum na ka bynta ka imlang sahlang ban treikam bha kum ka kynhun, bad ryngkat bad kata, ka Sorkar ka trei shitom ban pyndonkam ia ki jingtip bad ka teknoloji na ka bynta ka jingsynshar kaba kham bha”, u la bynrap. U la pynshlur ruh ia ka kynhun ki samla ban shim kabu lyngba ki kompeni IT kiba wan sha kane ka nongbah Shillong.

Ka iMerit ka dei ka AI Solutions IT Company kaba don haduh 5000+ ngut ki nongtrei ha kylleng ka United States, Europe, Bhutan bad India, ha kaba 200+ ngut ki nongtrei ha Meghalaya kiba kynthup ia 64% ki nongtrei ki dei ki kynthei.