Plie u CM ka jylla ia 17 tylli ki processing unit ha ka jingrakhe ia ka Farmers’ Day ha North Garo Hills

Syllad | The Rising MeghalayaDecember 19, 2023

U Myntri Rangbah ka Jylla, u Conrad K Sangma haka 18 tarik Nohprah, ula plie paidbah ia 17 tylli ki Food Processing Unit ha ka jingialang kaba la long ha Resubelpara, North Garo Hills District, shibynta ka jingrakhe ia ka sngi jong ki nongrep ne ‘Farmers’ Day ia kaba ju rakhe ha ka 4 tarik u Nohprah man la ka snem.

Haba ai jingkren ha ka jingialang u CM u la ong ba ka sorkar kan sa plie haduh palat 100 tylli ki Processing Unit ha kine ki khyndiat bnai ban wan, bad ka ban plielad shibun ia ki paid nongrep ba kin ioh ban pynwandur ia ki mar rep kiba ki pynmih da kaba song ia kine ki mar bad ban pyniaid sha ki iew ki hat.

U la ong ruh; “Ban ngin poi sha ka thong, ngi donkam ia ka jingiashim bynta shitrhem jong ki nongrep ha kaba pyniaid iew ia ki mar rep khnang ban kyntiew ia ka ioh ka kot, bad na ka liang ka sorkar ka la kut jingmut skhem ban ai ka jingkyrshan kaba pura lyngba ki skhim bapher bapher kum ka Focus bad Focus+ ban pynthikna halor ki lad jingiarap pisa bad ka rukom pyndonkam ha ka lynti kaba dei.Ngi ai ruh ka jingkyrshan na ka bynta ban iada ia ki khlaw ki btap lyngba ki nongshong shnong.”

Nalor kata u Conrad u la ong ruh ba ki prokram kum ka YESS Meghalaya ki tyrwa ia ka jingkyrshan na ka bynta ki samla ha ka liang ka sengkam sengjam. Ula bynrap ruh halor ka jingdonkam ban iakhun pyrshah ia u drok lyngba ka jingiatreilang, bad halor kane u la ong ba ka sorkar ka la shim ia ki sienjam na ka bynta ban btin lynti ia ki samla.

Na ka liang u Myntri ka Tnat PHE u Marcuise Marak ha ka jingkren u la ong ba ki nongrep ki long u budlum jong ka imlang ka sahlang, bad hapoh ka jingialam jong u CM Conrad Sangma na ka liang ka sorkar ka la plie ia kiba bun bah ki prokram bad ki skhim kiba thmu na ka bynta ka bha ka miat jong ki paid nongrep.

Kiwei pat kiba la aijingkren ha kane ka prokram ki kynthup ia u Symbud Lamphang ka iingdorbar thawain u Timothy D. Shira, u  MLA ka Resubelpara, u Jude Rangku T. Sangma, MCS, PD, DDRD bad u Verdi Sangma, MCS, Assistant Commissioner, NGH bad BDO, Resubelpara kiba la ai ia ki kyntien pynshlur bad ai mynsiem ia ki paid nongrep khnang ban lah ban kyntiew ia ka ioh ka kot bad ka roi ka par.

Napdeng kiba bun ki projek ba la pyntreikam da ka sorkar Meghalaya, ka Lakadong Turmeric Mission tang ha kine ki san snem ka la sakhi halor ka jingkiew kaba haduh 13 shah ka jingpynmih shynrai. Kumjuh halor ka kam ri ngap lyngba ka Apiculture Mission, ka sorkar ka la lah ban aijingiarap ia haduh palat 4000 ngut ki nongri ngap da kaba thaw ruh ia ki jingpyniasoh lyngba ki iew ki hat bad ban pynshlur ba kin lah ban pynneh bad nang kyntiew ha kane ka kam. Kumjuh lyngba ka Piggery Mission da ka jingiatreilang bad ka National Cooperative Development Corporation, New Delhi ka sorkar ka la bei tyngka haduh palat 64 klur ban kyntiew ia ka kam ri sniang.Shuh shuh ki la don palat 1530 ki nongri masi kiba la ioh jingmyntoi lyngba ki 100 tylli ki kynhun iatreilang bad 1731 tylli ki masai aiud hapoh jong ka Meghalaya Milk Mission.

Kum shibynta na ka prokram, u Myntri Rangbah ula sam ruh ia ka cheque jong ka FOCUS, ka YESS bad PES (Payment on Eco System) kaba T.2.61 klur sha ki nongioh jingmyntoi jong ka ri-lum Garo.