Plie u CM ka jylla ia ka North East Summit ban rat dyngkhong ia ka jingpang TB

Syllad | The Rising MeghalayaNovember 7, 2023

U Myntri Rangbah ka jylla u Conrad K Sangma haka sngi ba Ar u la plie ia ka “North East TB Free Summit” kaba thmu ban rat dyngkhong ia ka jingpang Tuberculosis (TB) ha ka jingialang kaba la long ha Courtyard Marriot ha ka jingiadon lang ka Myntri ka Tnat ka koit ka khiah ka Dr M Ampareen Lyngdoh bad u Dr Roderico H Ofrin, WR, WHO India.

Haba aijingkren ha ka jingialang u CM Conrad Sangma u la ong ba ki lad aijingsumar ka dei ka thong kaba hakhmat eh jong ka sorkar. “Ha kine ki khyndiat snem ba la dep ngi la bteng ban shim ia ki sienjam ban kyntiew ia ka jingtreikam jong ki tnat ka koit ka khiah da kaba pyntreikam ruh ia kiba bun ki lad ki lynti ban kyntiew bad pynbha ia ki lad aijingsumar ha ka jylla hi baroh kawei,” u la ong.

U CM u la pyntip ruh halor ka jingkyntiew jong ka sorkar ia ka mang tyngka na ka bynta kyntiew ia ka jingtreikam kiba iadei bad ka koit ka khiah. Ia kaba bun na kane ka mang tyngka la pynlut ha ki jingtreikam jong ki ‘health mission’  kumjuh ki ‘health bad wellness centres’ kaba la iarap shibun ban pynbha bad pynjanai shuh shuh halor ki lad jingsumar.

Haba pynpaw halor ka jingdon bynta jong ki kynthei ha ki jingtreikam hapoh ki Self Help Group bapher bapher, u la ong ba kane ka la nang kyntiew ha ka liang ka roi ka par bad ka koit ka khiah. U la ong ruh ba ka jingiadei hapdeng ka koit ka khiah bad ka jingkiew ha ka liang ka roi ka par ka dei kaba lah ban bishar bniah na ka jingshah ktah kum halor ka jingiap jong ki briew, ka jingiap jong ki khunlung bad ki jait jingshitom kiba ktah ia ka kha ka pun.Nalor kata ula ong ruh ba ka ioh ka kot ka dei u mawbyrsiew ba kongsan eh jong ka jingroi ha ka ioh ka kot hapdeng ki nongshong shnong. 

Na ka liang u CM ula ong ruh ba ka don ka jingpynslem ha kaba iadei bad ka jingai jingsumar ia kiba pang TB khamtam kito kiba wan na ki longiing kiba duna ha ka ioh ka kot ki bym shym la leit sha ki doktor tad haduh ba ka jingshitom ka la kham ban jur.

“Ka jingiashim bynta lang da ki bor shnong, ka jingpynioh ia ki jingbam kiba tei, ka jingwanrah ia ki buit aijingsumar, ka jingpyndonkam ia ki kor jingstad ha kaba aijingsumar, ka jingpynshai bad ka jingtuklar kloi ia ka jingpang, ka jinglehkhuid bad kiwei pat ki sienjam kilong katto katne ki lynti kiba lah ban pynpoi sha ka thong ban pynlong ia ka India kaba lait na ka jingpang TB kat haduh u snem 2025,” ong u Conrad Sangma.

Nalor kata u la ong ba ka jylla ka don ia kajuh ka thong bad ka jingangnud jong ka ri, bad ka Meghalaya ka don ia ki jaka lum jaka them kiba shem jingeh bad ki nongshong shnong kiba saphred kaba donkam ban pynbiang ia ki jaka sumar na ka bynta ka jingpang TB ha ki thain kiba pajih. Ka jingiakhun pyrshah ia kane ka jingpang kan dang iaid shakhmat, hynrei lyngba ka jingtrei shitom bad ka jingiatreilang yn lah ban pynduna ia ka jingshah ktah, ong u CM.

Shuh shuh u la kyntu ia ki kynhun bapher bapher kiba don ha ka tnad ka koit ka khiah ba kin nangtrei shitrhem na ka bynta kane ka thong ha ryngkat ka jingkut jingmut bad ka jingtrei shitom.

Kiwei pat kiba la ai jingkren ha kane ka sngi ki kynthup ia ka Myntri ka Tnat ka koit ka khiah, ka Kong Ampareen Lyngdoh, u Dr Roderico H Ofrin uba dei u WR, WHO, India bad kiwei pat.

Na ka liang u Myntri Rangbah ka jylla ula pyllait paidbah ruh ia ka kor Meghalaya Mobile Portable AI based X-Ray diagnostic.