Plie u CM ka jylla ia ka ophis Municipal bad Market Complex ha iew Soil Bazar, Williamnagar

Syllad | The Rising MeghalayaAugust 22, 2023

U Myntri Rangbah ka jylla u Conrad K Sangma haka 21 tarik Nailar u la plie paidbah ia ka jingtei bathymmai jong ka Municipal ophis cum Market Complex hapoh iew Soil Bazar ha Williamnagar.

Ha kane ka jingialang la ia don lang ruh u Myntri ka tnat PHE u Marcuise Marak bad u MLA ka Rongjeng u Jim Sangma.

Haba kren ha ka jingialang, u CM Conrad Sangma u la ong ba ka jingdawa ia ki jingtei na ka bynta ki projek bapher bapher ha ka jylla ki la iaid shakhmat, bad na ka liang ka sorkar ka don ia ka jingkut jingmut ban pyntreikam ia kine ki projek hapoh jong ka por ba la buh ban pyndep.

U la ong ruh ba ka thong jong ka sorkar ka long ban aibor ia ki nongshong shnong, ban kyntiew ia ka ioh ka kot bad ban plie ia ki lad ki lynti na ka bynta ka jingim kaba kham biang ha ka liang ka ioh ka kot na ka bynta baroh ki nongshong shnong.

“Ka sorkar jong ngi ka ithuh ia ki bynta ba kongsan halor ka jingdonkam a ki jingtei kiba iadei bad ki jingtreikam bapher bapher bad ki lynti surok na ka bynta ban pyniasoh bad ki nongshong shnong, ban kyntiew ia ka ioh ka kot bad ban plie ia ki lad kamai kajih. Ka jingangnud ka long ruh ban pynthikna ba man uwei pa uwei u nongshong shnong kin ioh ia ki jingmyntoi lyngba kine ki kam pynroi.”

Nalor kata u la bynrap ruh ba ka sorkar jylla ka don ia ka jingiohi jngai ha kaba ki nongshong shnong kin ioh ia ki jaka treikam kiba biang katkum ka juk, ka pule puthi nalor ki lad jingsumar kiba biang.

Ula ong ruh ba ka jingplie ia ka Williamnagar Municipal Office cum Market Complex,  ka dei uwei pat u mawjam na ka bynta ka jingpynbiang ia ki jaka treikam na ka bynta ki nongshong shnong. Kane ka ia iaid ryngkat bad ka jingphaikhmat bad ka jingiohi jngai jong ka sorkar ban kyntiew ia ka jinglong jingman bad ia ka roi ka par jong ki nongshong shnong ka Jylla Meghalaya, kata haba pynpaw halor kiba bun ki kam pynroi ha Williamnagar, kata kynthup halor ka jingpyndep pynshna ia ki surok, ka jingwanrah ia ka mini stadium bad ka jingpynbhabriew ia kane ka jaka sor.

Shuh shuh u CM ula pynbna ruh ba na ka liang ka sorkar kan shna pynbha noh ia ka Rongrenggre Higher Secondary School, kaba dei kawei na ki skul kaba la rim Tam hapoh ka district khnang ban kyntiew ha ka liang ka pule puthi hapdeng ki khynnah pule. Nalor kata u la pynpaw ruh ha kaba iadei bad kiwei pat ki projek kiba dang iaid shakhmat, kaba kynthup halor ka jingtei ia ka Williamnagar College bad ka Mini Stadium kaba dang iaid shakhmat ha Williamnagar.

Ha kane ka sngi u la pynlong ruh ka jingleit jurip ia ka lynti surok kaba pyniasoh ha ka shnong Rangmal Badim bad hadien Ula sam ruh da ki  Digital Learning Aids (M-Tab) sha ki samla pule ka Williamnagar lyngba ka Chief Minister’s Digital Learning Aid for Students Scheme.

Ula sam ruh iaki symbai Cinnamon sha ki nongrep ka East Garo Hills District kumshibynta ka Spice Mission.

U Myntri Rangbah ula pyllait paidbah ruh ia ki lai tylli ki bolero pick up Hapoh ka Mission Organic Value Chain Development of North Easter Region Phase -I .