Plie u CM ka Jylla iaka Phulbari Substation ha West Garo Hills

Syllad | The Rising MeghalayaDecember 21, 2023

U Myntri Rangbah ka Jylla Conrad K Sangma haka 20 tarik Nohprah, ula plie paidbah ia ka 2×50 MVA, 132/33 KV Grid Substation ha Phulbari, West Garo Hills District bad ka ban iarap shibun ha kaba iadei bad ka jingdonkam bording hapoh ka thain.

Ha kane ka jingialang la iadonlang ruh ka MP ka Tura ka Agatha K Sangma, u Myntri ka Tnad Bording Abu Taher Mondal, u Myntri ka PHE Marcuise N Marak, u Myntri kam ialehkai Bah Shakliar Warjri bad ki Nongmihkhmat jong ka Meghalaya Power Transmission Corporation Limited, MPTCL.

Haba aijingkren ha ka jingialang, u CM ula ong “Mynta ka sngi ka dei ka sngi ka ban sah kynmaw ia ka thain da ka jingplie paidbah ia kane ka project kaba kongsan. Ka jingwanrah ia ka substation kaba hehduh ha ka thain kan wanrah ia shibun ki jingkylla. Ha ki snem bala leit noh, wat hapdeng ka jingioh bording, ngi ju mad ia ka jingeh ba rit palat ka voltage, hynrei ka jingplie ia kane ka substation ba thymmai kane ka thain jong ngi kan ioh ia ka voltage kaba long kumjuh bad kiwei ki thain.”

Katba u Myntri ka Tnat Bording u Abu Taher Mondal ha ka jingkren ula kdew ia ka jingkongsan jong kane ka substation, kata da kaba ong “Da ka jingplie ia kane ka substation, ngin sa lah ban pyndap ia ka jingdawa bording jong ka thain West Garo Hills khlem kano kano ka jingthud. Kane ka dei ka sakhi halor ka jingkut jingmut jong ka Sorkar ban wanrah ia ka  jingkylla ha ka ha kaba iadei bad ka kam sam bording hapoh ka thain”.

Ka jinglah ban plie ia kane ka substation ym tang ba ka pynpaw ia ka jingjop ym tang ha ka liang ka jingstad teknologi hynrei ruh halor ka jingtrei borbah jong ka MPTCL ban pynkup bor ia ki shnong ki thaw lyngba ka jingpynioh ia ka bording kaba thikna bad kaba neh,

Shuh shuh ha kane kajuh ka sngi, u Myntri Rangbah ula buh mawnongrim ruh na ka bynta ka jingtei ia ka Indoor Stadium ha JP Higher Secondary School, Bholarbhita, West Garo Hills.

Haba pynpaw ia ka jingsngewnguh, na ka liang u CM ula ai khublei ia u Myntri ka Tnat Sports ka jylla uba lah ban pynioh haduh T.9 klur ban tei ia ka gallery bad ka madan phlang plastic ne artificial turf, ka ban iarap shibun ban kyntiew ia ki kam ialehkai sport hapoh ka thain hi baroh kawei.