Plie u CM ka jylla iaki surok bad jingkieng ha East Garo Hills

Syllad | The Rising MeghalayaNovember 28, 2023

U Myntri Rangbah ka jylla u Conrad K Sangma haka sngi Nyngkong u la leit ban plie ia ki projek lynti surok bad jingkieng ha East Garo Hills, kata ia ka lynti surok ba la tip kum  L051-Nengmandalgre sha Daribokgre (Mandalgre) kaba 35 km, ka L042 Cherangre sha Sisobibra (Nengmandalgre sha Gitokgre) kaba 7.820 km kumjuh ia ka jingkieng kaba 51.68 mitar kaba don halor jong ka wah Rongon bad kaba 51.68 mitar kaba don halor jong ka wah Rongre ha ka jingialang kaba long ha madan Nengmandalgre.

Ha kane ka jingialang la ia don lang ruh u Symbud Myntri Rangbah ka jylla u Bah Prestone Tynsong, u Myntri sorkar bad MLA ka thain u Marcuise N Marak, ka dkhot ka Parliament ka Agatha K Sangma nalor kiwei pat.

Haba kren ha ka jingialang u Myntri Rangbah ula ong ba kine ki surok ba la plie paidbah kilong kiba kongsan bha na ka bynta ka roi ka par jong ka thain hi baroh kawei. U la ong ba ki lynti surok ki long kiba kongsan na ka bynta ka roi ka par ha kino kino ki jaka namar khlem ki surok ki kam pynroi kin ym wan satia.

Da kaba ai khublei ia ka dkhot ka Parliament ka Agatha K Sangma halor ka jingpynroi ia kine ki surok lyngba ka skhim PMGSY ka sorkar pdeng, u Conrad ula ong ruh ba ka Meghalaya kadei kawei na ki jylla kaba lah ban pyntreikam bha ia ka skhim PMGSY.

Nalor kata u Myntri Rangbah ula kren ruh halor ki 5 tylli ki mat treikam ba hakhmat ka Sorkar Jylla.

“Ngi don san tylli ki mat treikam ba hakhmat eh bad kita ki long ka surok ia baroh, ka bording ia baroh, ka iing ia baroh, ki jingtip ia baroh bad ka um ia baroh. Ngi la treikam mynta ha kata ka rukom kaba ngin lah ban kynthoh ia kane ka thong ha kine ki khyndiat snem ban wan” ula ong.

Nalor kata u pyntip ba na ka bynta u snem 2023-2024, hapoh ka skhim PMAY, ka Sorkar kala pyllait pisa haduh T.1600 klur na ka bynta ban shna ia ki 1500 tylli ki iing bad ula ai khublei ia kane ia ka MP kaba la shimkhia ban pynurlong. Kumjuh u la pynpaw ruh ha kaba iadei bad kiba bun ki sienjam ki ban lah ban kyntiew ia ka roi ka par jong ki nongshong shnong bad ha kaba iadei bad ki skhim ki ban plielad ha ka liang ka sengkam sengjam bad ki prokram bapher bapher na ka bynta ki samla.

Kham hashwa na ka liang u Symbud Myntri Rangbah ka jylla u  Bah Prestone Tynsong ha ka jingkren ula ong ba ki surok ki dei ki jingkyrkhu ia ka ioh ka kot, ka koit ka khiah, ka pule dangle bad ki kam ba manla ka sngi jong ki briew kiba don ha ki shnong ba iaid kine ki surok haba ong ba ka Sorkar kala pynthikna ba ka roi ka par ka poi ha manla ki shnong. U la ong ruh ba lyngba ka skhim PMGSY na ka liang ka sorkar ka la lah ban pyntrei haduh 1200 km ha kylleng ki jaka. Ha ka juh ka por ula pan ruh ia ka jingiatreilang jong ki Nokma, Sordar bad ki trai jaka haba iadei bad ka jingiadie iathied jaka ban shna ia ki surok na ka bynta ka bha ka miat jong ki paidbah ka Jylla.

Shuh shuh u la ong ruh ba ka pisa bala mang ia ka Jingkieng halor ka wah Rongre bad ka surok Jakopgre sha Nengmandalgre ka long T. 176.969 lak bad ia ka jingkieng halor ka wah Rongon bad ka surok Jakopgre sha Nengmandal ka long T. 151.140 lak.