Plie u Lahkmen iaka Science Block ka Sohkha Govt Higher Secondary School

Syllad | The Rising MeghalayaJanuary 10, 2023

Tang hadien ar snem bala buh mawnongrim iaka Science Block jong ka Sohkha Government Higher Secondary School, u myntri ka tnad pule puthi ka sorkar Jylla uba long ruh u MLA Amlarem Constituency Ma Lahkmen Rymbui haka sngi Nyngkong ula plie paidbah ia kane Science Block.

Nalor u Ma Lahkmen la iadonlang Dr. BDR Tiwari, IAS, Commissioner & Secretary, Education Dept, Meghalaya, ka Kong R. M. Kurbah, IAS, Director of School Education & Literacy, ka Kong AP Syiem District School Education Officer, u principal ka skul R Sumer, ki nongïalam shnong, ki nonghikai bad ki khynnah skul.

Ia kane ka science block la tei haka jinglut kaba 1 klur 73 lak 13 hajar. La sdang tei ia kane ka skul naduh u Nohprah 2020.

Pule | Hapoh 30 bnai yn pyndep iaka Residential Skul ha Umladkhur: Lahkmen

Ka Sohkha Govt Higher Secondary School ka dei kawei na ki skul sorkar kaba paw bha ha ka thain War Jaintia bad kala ju rung ruh haka kyrdan merit list haka resol ka MBOSE.

U Ma Lahkmen haba kren kum u kongsan ula ong ban pynbha shuh shuh jingsam jingnang jingstad kane ka skul kala pynlong ia u ban theh jingiarap ia kane ka skul khnang ban kyntiew iaka jingnang jingstad ha ki thain nongkyndong.

Da ka jingtei pyndep ia kane ka science block ki khynnah kiba kwah bteng iaka jingpule haka science stream kila ioh iaka kamra klas bad ban pule hala shnong bad kim donkam shuh ban pule shabar la shnong, la ong Ma Lahkmen.

Shuh shuh ula iathuh ban pynsuk ïaki khynnah skul ka Shnong Sohkha bad ki shnong ba marjan, ka sorkar Jylla kala buh iaka MBOSE Examination Centre ha kane ka skul.

Ula ong ba sorkar jylla ban pynbha iaka pule puthi ha kine ki san snem ka sorkar kala theh jingiarap sha ki 25 tylli ki kolej bad tei pynbha pynmiat ïaki 300 tam tylli ki ïing skul.

Ula pynshlur ruh iaki samla pule ba hadien ba kila pass klas 12 na kane ka skul ki dei ruh ban pynkhreh iaka Integrated Course kaba 4 snem ka ban sdang ha BEd College ha Jowai namar ha u 2030 shaneng baroh kiba hikai haki skul ki hap ban pyndep ïaka Degree kaba 4 snem.

Hashwa kane u Bah PS Suchen ula pynsngew ïaka khana lyngkot ka  Sohkha Govt. Higher Secondary School kaba la seng ha u snem 1959 bad ki jingdonkam jong ka kum ka Labrotary, ka Auditorium, ban thung Principal, ka jingshna Fencing, skul bos bad kiwei.