Plie u Lahkmen Rymbui iaka iing skul thymmai ka Ammutong LP School kaba shongdor T.44 lakh tam

Syllad | The Rising MeghalayaApril 17, 2025

Ka Ammutong Government Lower Primary School, Amlarem Block, West Jaintia Hills District kaba la seng naduh u snem 1947 kala ioh iaka iingskul kaba thymmai kaba don 7 tylli ki kamra klass.

Ia kane ka iingskul kaba thymmai la plie haka 17 tarik Iaiong da u MLA ka thain Ma Lahkmen Rymbui haka jingdonlang u MDC JHADC Ma Medeling Swer, u Incharge SDSEO Amlarem Ma C. Lamin, ki nongialam shnong, riew rangbah ka shnong, ki nonghikai, ki kmie ki kpa bad ki khynnah skul.

Ia kane ka iingskul la buh maw nongrim ha u snem 2022 haka por ba ka skul ka rakhe iaka lyngkhuh dap 75 snem ne Platinum Jubilee bad la tei haka jinglut kaba T.44,78,448 naka bynta ban ai ka jinghikai kaba bit ba biang ia ki khynnah kane ka skul.

Ha kane ka juk hi ka sngi u Ma Lahkmen Rymbui, ula plie ruh iaka Community Hall jong ka shnong Ammutong kaba la tei haka jinglut kaba 25 lak tyngka lyngba ka Border Areas Development kaba hap hapoh ka SCA (BADP) jong u snem 2019-2020 (ADDL).

U Ma Lahkmen Rymbui haka jingkren ula ong, kum u nongmihkhmat ka thain ula pyrshang ban wanrah shibun ki kam pynroi bad ruh ban pynbha iaka pule puthi hapoh ka Constituency.

Ula pyntip ruh ba hapoh ki 7 tylli ki snem, la don 40 tylli ki skul kila ioh iaki iingskul kiba thymmai lyngba ka jingiarap ka tnad pule puthi ka sorkar Jylla, Border Areas, MLA skhim, nalor kiwei kiwei ki skhim sorkar.

Ula ong ruh ba ka sorkar kala ïaleh katba lah ban pynbiang ïaki jingdonkam khnang ba ki khynnah kin ïoh ïaki jingdon kam jong ki kum ki khynnah skul bad ka thong hi jong ka sorkar ban pynbha pynmiat ïaki ïing skul ka long ba ki khynnah kin ïoh ïaka jinghikai katkum ka juk kaba mynta.

Ula ïaroh iaka jingiatrei lang ki nonghikai bad ki bor shnong bad kyntu ban nangiai trei shitom khnang ba ki khynnah kin lait ka jingpep skul shiteng por.

Ula pyntip ruh ba iaka Hall jong ka Sub Division hapoh Amlarem kaba la thmu ban tei haka jinglut kaba T. 3 klur 45 lak yn buh maw nongrim la kumno kumno haka 30 tarik Iaiong lane 1 tarik Jymmang 2025 khnang ban sdang noh iaka jingtei kaba u paidbah ka Sub Division ula donkam bha.

Hashwa kane ka nonghikai ka Kong Debora Sumer kala ong, ka jingioh iaka iingskul kaba thymmai kan long ka jingkyrkhu iaki 77 ngut khynnah namar nangne shakmat kin ioh ban shong ha la ki jong ki jong ki kamra ym kumba mynshwa ba hap ban shong lang ha kajuh ka kamra.

Wat la kane ka skul kala ioh iaka iingskul kaba thymmai hynrei ka Kong Sumer kala ong ba dang don shibun ki bynta kiba ka skul ka dang donkam kynthup ki ben ki desk, ki miej ki shuki, ki duli buh kot, ka painkhana na ka bynta ki shynrang bad kynthei, ki madan ialehkai, kumjuh ki nonghikai nalor kiwei ki jingdonkam.

Iaka jingialang la pyniaid da u Waheh shnong Ammutong Ma K Nyalang bad la ioh ka jingkren na u Ma C. Lamin Incharge SDSEO, Amlarem bad la pynphuh pynphieng iaka jingialang da ki jingrwai bad jingshad na ki khynnah bad nonghikai ka skul.