Plie u ma Comingone Ymbon iaka iing lehniam Kopati Puja ka Raij Raliang

Syllad | The Rising MeghalayaNovember 24, 2020

Ka jingangnud kaba la slem ban ïoh ïa ka ïingsah na ka bynta ban pyndep bad pynïaid shakhmat ïa ki kam ñiam kam rukom ka Kopati Puja ka Raij Raliang kala urlong hadien ba u MLA ka 3-Raliang Constituency u Comingone Ymbon ula wan ban plie bad ot ribon ïa kane ka iing lehniam kaba don ha Khlooblai (Khlaw kyntang) ka shnong Raliang haka sngi Nyngkong.

Ïa kane ka Community Hall la tei lyngba ka Special Rural Work Programme (SPWP) Scheme jong u snem 2019-2020 ha ka jinglut kaba 4, 50,000 tyngka (Saw lak sanphew hajar).

Hadien ba la dep plie paidbah ïa kane ka ïing, ka la don ka jingïalang lyngkot ba la pynïaid da u Waheh Shnong Raliang u SS Lamare bad la ïoh ruh ki jingkren na u Dolloi ka Elaka Raliang u Chawas Lyngdoh, u Pator ka Raij Raliang u Stephan Dkhar, u Pynbait Lyngdoh Waheh Shnong Laskeiñ, u Rikut N Parien uba la mihkhmat ïaki Soo Lyngdoh bad u Dr. M Tyngkan.

Baroh ki nongkren ki la ai jingïaroh shi katdei eh ïa u MLA uba long uwei na ki nongïalam uba la pynkylla dur ïa ki shnong kiba don hapoh ka 3 Raliang Constituency lyngba ka jingwanrah jong u ïa shibun ki kam pynroi.

Ha ki por mynshwa ki Soo Langdoh ki juh ïashong ïasah miet khapñiah ha ïing jong u Wamon kumba Lai miet Saw sngi ban pyndep ïaka lehniam Kopati Puja kaba juh pynlong shisien shisnem ban ainguh kyrpang ïaki blei ki syiem kiba la ri la da ïaki khun ka Elaka baroh shi snem lynter, hynrei ka ijngioh ia kane ka ïing ka la pynsuk shibun ïaki Soo Langdoh ban pyndep ïaka lehniam Kopati Puja, ïathuh u Bah Rikut N Parien.

U BDO ka Laskeiñ u Brightstar Langbang uba long u symbud kongsan ha kane ka sngi ula ïaroh ïaki nongkitkam ka raij Raliang khamtam eh ïa u Dolloi u Chawas Lyngdoh uba la trei borbah bad shimkhia ïa kane kam ka kat haduh ba la lah ban pynïeng ïaka ïing na ka bynta ka jingdonkam jong ka raij.

U Ma Comingone Ymbon haka jingkren ula ong ba ula pyrshang ban ai ka jingshakri kaba salonsar ïa baroh ki shnong hapoh ka Constituency ban wan wanrah iaka roi ka par.

“Nga dei u briew uba kwah bha ban kyntiew ïa ka roi ka par hapoh ka Constituency bad haba nga sam skhim nga sam haba shit ba shai khlem leh shilliang ïano ïano na ka bynta ka jingbit jingbiang jong ka Constituency hi baroh kawei”, ong u Ma Comingone.

Ula pynpaw ka jingsngewdiaw namar ba don ki shnong kiba khlem pyntrei hok ïaki skhim bad kane ka pynsngew shibun ïa u kum u nongmihkhmat ka thaiñ.

Ula kyntu ban sumar sukher bad lehkhuid ïa kane ka ïing namar ba kadei ka ïing ka ban ai jingmyntoi ïaki.

Shuwa ban plie ïa kane ka iing lehniam ka la don ka nguh ka dem bad ka kñia ka khriam kaba la pynphuh pynphieng ïa kane ka sngi da ki jingshad pliang ba la ïashim bynta ki samla ka riaj Raliang.