Plie u ma Lahkmen ïaka ïingskul thymmai ka Jong U Shen Govt LP Skul kaba kot T. 44 lak tam

Syllad | The Rising MeghalayaFebruary 29, 2024

ka Jong U Shen Govt. LP School kaba la seng naduh u snem 1952 halor ki kyntien im sngi “It all begins here” kaba hap hapoh ka Amlarem Sub Division, West Jaintia Hills District ka la ioh iaka iing skul kaba thymmai kaba don 7 kamra.

Ia kane ka iing skul thymmai la tei haka jinglut kaba 44 lak 77 Hajar tyngka lyngba ka Meghalaya School Infrastructure Improvement Program jong ka tnad pule puthi ka sorkar jylla.

Ia kane ka iingskul bathymmai la plie da u MLA ka Amlarem Bah Lahkmen Rymbui haka 28 tarik Rymphang haka jingdonlang ka Kong Sawan Lura Pyrtuh SDSEO Amlarem, ki nonghikai, ki khynnah skul, ki nongshong Shnong bad kiba shah khot sngewbha.

Iaka jingialang kaba la long ha phyllaw jong ka iingskul, la pyniaid da u Andreas Myrmen bad la ioh ka jingkren pdiang burom na ka Head teacher ka Kong Unity Shylla kumjuh na u Waheh Shnong Jong U Shen Resting Tariang.

U Bah Lahkmen Rymbui haka jingkren ula pynpaw ka jingkmen namar haki 5 snem kiba la dep naduh 2018 haduh 2023, ka 7- Amlarem kala ioh haduh 35 tylli ki iing skul kynthup kiba shna thymmai bad shna pynheh (Extension).

Shuh shuh ula pyntip ba naduh Syndai, Kmaishnong, Amjalong, Jong U Shen bad Amsohtai la dep sanction na ka bynta ki iingskul hynrei kaba donkam mynta ka long ba ka Managing Committee ryngkat ki nonghikai kin ai ka jingiatreilang na ka bynta ki jingduna bad jingdonkam jong ka skul.

Ha kaba iadei bad ka pule puthi haki thain nongkyndong ula Bah Rymbui ula ong, ba ki nonghikai haki thain nongkyndong ki long kiba bit ba biang katkum ka juk kaba mynta, hynrei kadei tang ka jingshaniah jong ki kmie ki kpa iaki nonghikai bad ki nonghikai ruh kin wan hikai tista shaki skul khnang ba ki khynnah kin ioh iaka jinghikai kaba paka.

U MLA ula kyntu ruh iaki khynnah skul ban minot bad trei shitom namar lyngba ka jingtrei shitom ka jong ki, ba sa lah ban kyntiew pat iaka skul sha ki kyrdan kiba kham shalor.

Ha kaba iadei bad ka dorkhas kaba la aiti na ka bynta ki jingdonkam jong ka skul, u Bah Rymbui ula ong ba ka sorkar haka jingshong dorbar kaba dang shu dep shen na ka bynta u snem 2024-25 ka la mang kumba 300 klur tam a na ka bynta ban iarap iaki skul bad ruh u kyrmen skhem ba yn lah ban pynrung iaka Jong U Shen Govt. LP School hapoh kane ka mang tyngka.

Haba pynshlur iaki samla ban ieng hala ki kjat lajong khlem da shaniah haki kam sorkar, u Bah Rymbui ula pyntip ba ka sorkar ka plie iaki lad ki lynti iaki samla la ka long haka kam rep kam riang, ri jingri, kam jngohkai pyrthei ne seng lajong nalor kiwei kiwei ban iarap iaki samla ka jylla haduh 5 lak ngut.

Nalor ki iingskul, u MLA ula pyntip ruh ba iaka surok naduh Amlarem shaduh Pdengshakap la sanction ha u bnai Lber ban siang rong iaka surok khnang ban pynsuk iaki paidbah nongleit nongwan. Nalorkata ka Amlanai ka la ioh sanction 3 Km, ka Darrang 2 Km kumjuh ka Sohkha Mission, Lamin, Thangbuli, Demthriang ruh kin sa ioh.

Shuh shuh u MLA ula kyntu ruh iaki nongshong Shnong ban shim kabu iaki skhim sorkar khamtam kiba wan lyngba ka sorkar kmie kum ka IMHS khnang ban ioh jingmyntoi haba pang bad shitom.

Ula kyntu ruh iaki khynnah pule class 9 bad class 10 ban applai iaka CM Schoolarship kaba u myntri rangbah ka Jylla u dang shu pynbna shen. La kyntu ruh iaki khun samla kiba ialeh iaka eksam Class XII ban iakhun iaka exam CUET kaba ka National Testing Agency jong ka sorkar pdeng ka la dep ban pynbna ba ka la pdiang iaki application form naduh mynnin ka sngi haduh 26 tarik Lber 2024.

Khatduh u MLA u kitbok kitrwiang bad aimynsiem ia baroh ki khynnah pule ki ban iakhun iaka SSLC bad HSSLC 2024.

Ha kane ka sngi ki bor pyniaid skul ki la pynkup burom ruh iaki arngut ki nonghikai ba la shongthait kiba kynthup ia u John Buam bad Kong Martha Buam.

La pynphuh pynphieng iaka jingialang da ki jingshad na ki khynnah kane ka skul.