Plie u ma Lahkmen Rymbui ïaka ïing dorbar ka shnong Chyrmang ba ioh myntoi na jingiada iaka ‘law kyntang

Syllad | The Rising MeghalayaOctober 9, 2020

U Myntri jong ka tnad ka Home (Police), Pule Puthi bad kiwei kiwei ma Lahkmen Rymbui haka sngi Thohdieng ula plie paidbah ïaka iingdorbar jong ka shnong Chyrmang kaba ioh myntoi na ka jingai jingiada iaka ‘law kyntang ka shnong bad pynkylla ïaka sha ka Community Reserve da ka jingiatreilang bad ka tnad kam khlaw ka sorkar Jylla.

Kane ka ‘Community Hall cum Nature Interpretation Centre’ ka dei ka skim kaba la bei pisa da ka sorkar kmie haduh T.25 lak naka ‘Centrally Sponsored Scheme -Integrated Development of Wildlife Habitat for the community reserve of ‘Ka Khloo Blai Seinraij Kongwasan Chyrmang’.

Ha kane ka juh ka sngi la pynkut ruh iaka Wildlife Week kaba pynlong da ka Wildlife Wing Forest and Environment Department, Government of Meghalaya bad ka ophis ka Divisional Forest Officer, Jaintia Hills. Kane ka Wildlife Week kadei ka prokram kaba pynlong manla u snem ha une bnai ban ialap pynsngewthuh iaka jingkongsan ki mrad mreng bad ki jingthung tep bad ban ai jingiada iaki kumjuh ban pynneh pynsah ia baroh ki jingthaw ba im ha sla khyndew.

Ka mat pdeng jong ka Wildlife Week ka dei ‘Roar (Roar and Revive) exploring Human – Animal relationships.

U Ma Lahkmen ula ong ba  ki briew mynta kila sdang ban sngewthuh ban pynneh pynsah iaka mrad ki mreng bad kumjuh iaki jingthung jingtep bad kila pyrshang ban ai ka jingiada iaki khlaw ki btab bad iaki mrad ki mreng.

“Ngi donkam ban iada iaki mrad ki mreng, ki sim ki doh bad ki jingthung jingtep ban bit ban biang baroh u jingthaw ba im haka sla khyndew,” la ong u Ma Lahkmen.

Ula iathuh ruh baka Chyrmang bad Mustem yn wanrah iaki kam pynroi lyngba ka tnad Tourism haduh T.5 klur bad ka Mustem 8 klur bad 2 klur yn shna iaka surok ban pynsiasoh iaka shnong Iongnoh bad Chyrmang.

Shuh shuh ula ong baka rilum Jaintia kadei kaba riewspah haka jingdon jong ki mrad mreng, ki sim ki doh bad ula kyntu ia baroh ban tyngkai bad pynneh pynsah bad ban nym pyniap pathar iaki mrad ki mreng khnang ban myntoi ki shnong ki thaw ban lah ban pynkylla sha ka lad iohkam iohjam ha ki sngi ki ia ban sa wan.

Shuwa ban kren u ma Rymbui ula pyllait paidbah ruh iaki kot jong ki sim ki doh, ki mrad ki mreng ba lah ban shem ha rilum Jaintia.

Ha kane ka jingialang pynkut iaka Wildlife Week la iadonlang u Principal Chief Conservator of Forest & HoFF, Meghalaya Bah B. K Lyngwa, IFS,  Additional Principal Chief Conservator of Forest (Wildlife) & Chief Wildlife Warden, H.C Chaudhary, IFS, Superintendent of Police B. Marak, IPS, Chairman Management Committee, Ka Khloo Blai Sein Raij Kongwasan Chyrmang Community Reserve, K. Lakiang, Daloi Jowai Elaka P. Kynjing, Divisional Forest Officer, Jaintia Hills Office H.Lato, bad kiwei kiwei.

La sam ruh iaki khusnam sha ki khynnah skul bad ki nonghikai bala jop haka jingiakop bapher bapher bala pynlong ka DFO Wildlife, Jaintia Hills Division.

Hadien bala wai ka prokram u ma Lahkmen ula jurip ruh iaka law kyntang ka jong ka shnong Chyrmang.