Plie u ma MLA Jowai iaka umbam umdih ka shnong Mookaswan bad Lad Mynkseh ba shongdor T. 4 klur

Syllad | The Rising MeghalayaDecember 21, 2024

U MLA ka Jowai Wailadmiki Shylla haka 20 tarik Nohprah ula plie iaka skhim sam umbam kaba tip kum ka Mookaswan Water Combined Supply Scheme (MWCSS) ban myntoi ka shnong Mookaswan bad ka Lad Mynkseh kaba shongdor T. 4, 03, 23, 500.00.

Kane ka skim umbam umdih ka dei na ka skim Jal Jeevan Mission (JJM) kaba la sdang pyntrei ia kane ka projek haka 2 tarik Nailar 2021 bad la pyndep haka 15 tarik Nailar 2024. Haduh 163 tylli ki longiing jong ka shnong Mookaswan bad 43 tylli ki longiing jong ka Lad Mynkseh kin ioh iaka umbam umdih haduh ha thliew iing.

Ban pynneh pynsah ia kane ka um, ki nongshong shnong ka Mookaswan kila synniang mar 50 tyngka shibnai na ka bynta ban siew iaki nongtrei ki ban sumar sukher man ka sngi khnang ban pynthikna ba ka rukom pynpoi um ha man ki thliew iing kan long kaba biang.

Ka shnong Mookaswan ha kane ka jingialang kala aiti ruh iaka dorkhat ha u MLA bad EE PHE, RWS, Jowai Division halor ki jingeh ba ki iakynduh haka aiom tlang namar ba ka tyllong um kaba mynta, ka wah Myntang (Um nong nong), ka kylla long kaba duna um kaba pynlong ban shem jingeh ban tan iaka um bad la kyrpad ban shna iaka Checkdam ha katei ka wah khnang ban pynthikna iaka jingdon um ha baroh shisnem lynter na ka bynta ka shnong.

U MLA haka jingkren ula pynpaw ka jingkmen ba iaka jingdonkam kaba kongsan jong ka shnong Mookaswan la lah ban pynurlong bad pynpaw ruh ka jingsngewnguh iaki heh ophisar jong ka tnad PHE kiba la trei shitom ban pyndep ia kane ka projek na ka bynta ban pynpoi iaka umbam umdih sha ki nongshong shnong.

Ula kyntu iaki nongioh myntoi ba kin sumar sukher bha iaka jaka pynlang um, ki pipe um na ka bynta ban bit ban biang ka shnong bad ban ym pynlehnohei kai iaka um.

Nalor u MLA, la donlang ruh u MDC ma Wailad Bhoi, ka Executive Engineer PHE RWS Jowai Division ka Kong R. Kynjing, u JE, PHE ma J. Suchiang, u waheh shnong Mookaswan ma Phrangki Ryngkhlem, Secretary VEC Mookaswan ma Ridon Shylla nalor kiwei kiwei haka jingialang kaba la pyniaid da u ma Diangsuk Kyndait Assistant Waheh shnong.