Plie u Ma Vincent Pala iaka football shnong ka Madankynsaw Mowkyndeng

Syllad | The Rising MeghalayaDecember 12, 2021

U MP Lok Sabha Ma Vincent H Pala ula plie pyrda ïaka lympung ïalehkai Madankynsaw Premier League MPL Season 3 haka jingialang kaba long ha madan Umrajha ka shnong Madankynsaw Mowkyndeng haka sngi Saitjain.

Shwa ka jingplie pyrda ïaka lympung, u MP ula leit jurip ïaka madan shyiap kaba ka dorbar shnong ka thmu ban tei mini stadium bad mini indoor stadium. Ka shnong ka la aiti ruh ïaka dorkhat sha u MP haba ïadei bad katei ka jingthmu khnang ba ki samla ka shnong kumjuh ki marjan shnong kin ïoh lad ban pynpaw pyrthei ïaka sap ka phong jong ki. Nalor kata ula leit jurip ruh ïaka Farmers Development Center FDC jong ka shnong kaba la plie dangshen.

Ha kane ka jingialang plie la iadonlang u Ma Victor Suja, u Waheh shnong u Ma Danny Shadap, u Secretary shnong u Ma Bud Rimanki Chympa bad ki longkmie ka Womens group & Handicraft Multi Purpose Cooperative Society, Ïein tylli Village Organosation, MUSCC bad kiwei kiwei.

Ïaka lympung la pynshong shit da ki lahduh jong ka Madankynsaw Got Talent Season-1 bad ki longkmie ka Village Organisation.

U Vincent H. Pala haka jingkren ula kular ban tei ïaka Mini Stadium.

Ka dorbar Shnong ka la pynpaw ka jingkmen bad ka la kitbok kitrwiang ruh ïaki kam ba shakhmat jong u MP.