Plie u MLA ka Amlarem ia ka prokram aijinghikai na ka bynta ki briew kiba duna bad ki bym don ia ka bor iohi

Syllad | The Rising MeghalayaOctober 20, 2023

U MLA ka Amlarem uba dei ruh u Chief Advisor jong u Myntri Rangbah ka jylla u Bah Lahkmen Rymbui haka sngi Palei u la plie ia ka prokram aijinghikai na ka bynta ki briew kiba duna bad ki bym iohi pura ha ki khmat jong ki hapoh West Jaintia Hills District.

Ia kane ka prokram aijinghikai kaba shi bnai kynthih la pynlong da ka Society for Urban and Rural Empowerment (SURE), kaba dei ka kynhun iatreilang ha ki kam aijinghikai jong ka Meghalaya Skill Development Society (MSSDS).

Ha ka jingkren plie ia ka prokram kum u kongsan u Bah Rymbui u la pynshlur bad ai mynsiem ia kiba iashim bynta ha kaban ioh jinghikai da kaba pynpaw ba baroh ki dei kiba la pynkhamti ia la ki jong ki sap ki phong bad ia ka bor ban pyrkhat bad ban sngewthuh.

U la ong ba wat ki briew kiba biang ruh ki pulom ban ai ia kaba bha tam halor ki sap ki phong kiba ki don. Nalor kata u la pynshlur ia ki ba ki dei ban ioh mynsiem lyngba u Bah Kelvin Suting uba la mad ia kane ka juh ka jingeh, hynrei uba la kylla long u nonghikai batbit bad uba la ioh pdiang khusnam ba long ka nuksa na ka bynta jong ki. Nalor kata u la pynpaw ruh ba na ka liang ka sorkar ka don ia ki skhim na ka bynta kiba kum kine ki briew.

Kiwei pat kiba la aijingkren ha kane ka jingialang ki kynthup ia u Bah GLC Mylliem, Block Development Officer (BDO) ka Amlarem Sub Division, B. Wajri, General Manager of District Commerce and Industries (DCIC), u Waheh Chnong ka Moosakhia u Bah D  Suting.

Ha ka jingkren pdiang u Dr. H.H. Mohrmen u la pynpaw ba ka SURE h ryngkat ka jingiatreilang bad u Bah Lambormi Suchen, Skill Development Officer (SDO) ka West Jaintia Hills ki la trei borbah na ka bynta ban pynlong ia ki prokram aijinghikai ia kiba kum kine ki briew kiba mad jingeh ha ka imlang sahlang.

U Bah Lambormi SDO ha ka jingkren u la pynpaw ia ka jingsngew sarong ba ka West Jaintia Hills District ka dei ka district kaba nyngkong eh ha ka jylla ka ban ioh ban pynlong ia kaba kum kane ka prokram aijinghikai na ka bynta ki briew kiba duna ne ki bym iohi ha ki khmat ki jong ki hapoh ka jingialam jong u Bah Kelvin Suting.

Na ka liang u Bah Kelvin Suting uba dei u riew shemphang ha ki kam aijinghikai ha kane ka bynta u pynkynmaw ia ki por ha kaba u la ioh pdiang ia ki jinghikai bad pynpaw ruh   halor ka mt kaba iadei bad ki nongai jinghikai ki bym don jingduna ha ki khmat kumno ba ki la iaksaid ban sngewthuh halor ka jingeh kaba ki briew ki bym lah ban iohi ki iakynduh.