Plie u MLA ka Mawkynrew ia ka lympung ialehkai phutbol “4th Mawkynrew Cup”

Syllad | The Rising MeghalayaOctober 28, 2023

U MLA ka Mawkynrew Constituency, Bah Banteidor Lyngdoh ula plie paidbah iaka “4th Mawkynrew Cup” kaba la sdang 27 tarik Risaw hapoh ka shnong Jongksha.

Ka jingialehkai haka sngi sdang kala long hapdeng ka Jongksha FC pyrshah ia ka Khapmaw FC, ha kaba ka Jongksha FC ka la lah ba kan jop da 1-0, ha kaba ia ka kol la ioh ban thep da u P Kharsahnoh ha ka minit kaba 63.

Haba kren sha ki lad pathai khubor u Bah Banteidor uba dei artad u adviser jong ka Mawkynrew Cup Committee, ula pynpaw ba ha kine ki saw snem ka la don ka jingkylla ka rukom ialehkai jong ki khun samla ka Mawkynrew Constituecy, ha kaba lyngba na kane ka lympung ialehikai u sngewkmen ba la lah ban sei ruh ia ki kato katne ki rang ialehkai  ba kynsai kiba la ioh ban mihkhmat ia kiba  bun ki klob ne wat ia ka jylla.

Nalor katta u la ong ruh ba hadien kine ki saw snem ba u la lam lynti ban pynlong ia kane ka lympung ialehkai phutbol, na ka liang ka jong u ha ryngkat ka kynhun mynta  ki la sdang ban shong pyrkhat ban pynkylla noh ia ka dur ka dar kane ka lympung da kaba yn pynlong beit noh ia ka da ka league kaba pura kaban da ioh ia ka jingithuh  na ka MFA.

Haba phai sha ka jingpynlong ia ka jingialehkai naka bynta ki khynnah kynthei, u Bah Banteidor u  la ong ba  la shim ia kane ka sienjam khnang ban lah ban sei madan lem ia ki sap barieh ba ki samla kynthei ki don ha liang ka phutbol.

Ha kaba iadei bad ki jinglut jingsep na ka liang u Bah Banjteidor u pynpaw bala ioh ia ka jingkyrshan na ka liang ka Tnat Sports nangta na ka MACS kumjuh na ki  riew shimet bad ruh na ki kompeni.