Plie u MP Shillong iaka basa die doh ha Iawmuksow Mowkaiaw

Syllad | The Rising MeghalayaDecember 28, 2023

U MP ka Shillong ma Vincent H Pala haka 27 tarik Nohprah ula plie paidbah iaka basa die doh haka iew Iawmuksow Mowkaiaw.

Ia kane ka basa die la tei haka jinglut kaba T. 9,60,000, ha kaba T. 7 lakh la synniang da u MP Shillong lyngba ka Members of Parliament Local Area Development Scheme (MPLADS) bad bad T. 2,60,000 pat la pynlut naka dorbar Iawmuksow Mowkaiaw.

Kane ka iew ka dei kaba la sdang naduh u snem 1957 bad kadei kawei na ki iew kaba rim ha rilum Jaintia. Ka don haduh 370 tylli ki basa die mar bam, die jaiñ sopti, basa die iaki tiar pyndonkam ha ïing bad kiwei pat ki tiar ki mar ba bunjait.

U Vincent H Pala haba kren ula kyntu iaki nongdie nongthied ban pynneh iaka jingkhuid ki basa die doh kumjuh ka iew hi baroh kawei, khnang ban hun mynsiem ki paidbah haba bam iaki mar bam kumjuh ki doh ba thied na kane ka iew.

Haba iaroh iaki bor pyniaid  kane ka iew u ong, haka jingiaid lynti jong u kylleng kylleng u iohi ba ki briew ynda da ioh pisa  ioh skhim ki tur ban iaknieh, hynrei ha kane ka iew pat u iohi iaka jingpher ka rukom pyniaid, kata nalor ba ki lah ban pyniaid haka rukom ba long khuid long shai, kane ka iew kala don bynta ruh ban synniang ai jingiarap kylleng wat sha ki skul, ki balang bad kiwei ba donkam jingiarap.

U MP u kyrmen ba kin dang bteng shuh shuh iaki kam ba bha, khnang ba kum ki nongmihkhmat ruh kin suk ban synniang ha kano kano ka kam pynroi.

Ha kane ka sngi nalor u MP la iadonlang u MDC ka thaiñ u Winning G Sungoh, u BDO ka Laskeiñ Block u B.Niang, ki dkhot ka dorbar Iawmuksow Mowkaiaw, kiba shah khot sngewbha bad kiwei.

Haka jingialang ba pyniaid da u Chairman ka Iawmuksow Mowkaiaw u P Shadap, u Secretary u Pynbiangmi Laloo ula iathuh iaka khana lyngkot ka iew, bad la ioh ruh ka jingkren na u waheh shnong Mowkaiaw u Shaniah Lamare.